വെള്ളാപ്പള്ളി നടേശന്റെ പാര്‍ട്ടി വെറും കടലാസുപുലിയാണെന്ന് ബിജെപി വിലയിരുത്തല്‍. അതുകൊണ്ടുതന്നെ തുഷാര്‍ വെള്ളാപ്പള്ളിയുടെ കേന്ദ്രമന്ത്രിസ്ഥാനം കേരളത്തില്‍ തെരഞ്ഞെടുപ്പ് കഴിഞ്ഞിട്ട് തീരുമാനിക്കാമെന്നും ബിജെപി അഖിലേന്ത്യാ നേതൃത്വം തീരുമാനിച്ചു.
ഇടതുപക്ഷത്തുനിന്നും പ്രവര്‍ത്തകരെ അടര്‍ത്തിയെടുത്ത് അവര്‍ക്ക് ഭീഷണിയായി തീരാന്‍ ബിഡിജെഎസിനു കഴിയുമെന്നാണ് ബിജെപി പ്രതീക്ഷിച്ചത്. എന്നാല്‍ കാലം ഇത്രയുമായിട്ടും അതിനു സാധിച്ചിട്ടില്ല.
മലമ്പുഴയില്‍ വിഎസ് അച്യുതാനന്ദനെ പരാജയപ്പെടുത്താന്‍ വെള്ളാപ്പള്ളിയുടെ 60 ശതമാനം ഈഴവര്‍ക്ക് കഴിയുമോ എന്നാണ് ബിജെപി ഇപ്പോള്‍ നോക്കുന്നത്. അങ്ങനെ കഴിയുകയാണെങ്കില്‍ നടേശന്‍ മുതലാളിയെ ബിജെപി അംഗീകരിക്കും. ബിജെപി കേരളത്തില്‍ നോട്ടമിടുന്നത് ഇടതുപക്ഷത്തെയാണ്. കാരണം ഇടതുപക്ഷ പ്രവര്‍ത്തകരില്‍ വലിയൊരു ശതമാനം ഈഴവരാണ്. ഇവരെ അടര്‍ത്തിമാറ്റി ബിജെപിയിലെത്തിച്ചാല്‍ ആ വിടവില്‍ തിരുകികയറാം എന്നാണ് ബിജെപി കരുതിയിരുന്നത്. നെയ്യാറ്റിന്‍കര, അരുവിക്കര ഉപതെരഞ്ഞെടുപ്പില്‍ ബിജെപിക്ക് ലഭിച്ചത് ഇടതുപക്ഷ വോട്ടുകളാണ്.
ഈഴവരായ സാധാരണ പ്രവര്‍ത്തകരുടെ കുത്തൊഴുക്ക് ബിജെപി പ്രതീക്ഷിച്ചിരുന്നെങ്കിലും അതും സംഭവിച്ചില്ല. പ്രവര്‍ത്തകരെക്കാള്‍ നേതാക്കളെയാണ് ബിജെപി ലക്ഷ്യമിടുന്നത്. സാമൂഹ്യാംഗീകാരമുള്ള നേതാക്കളെ ലഭിച്ചാല്‍ മാത്രമേ എന്‍ഡിഎ മുന്നണി കേരളത്തില്‍ വളരുകയുള്ളുവെന്നും ബിജെപി.
തുഷാര്‍ വെള്ളാപ്പള്ളിക്ക് കേന്ദ്രമന്ത്രി സ്ഥാനം നല്‍കാമെന്ന വാഗ്ദാനവും ഇതിന്റെ ഭാഗമായിരുന്നു. എന്നാല്‍ ഈഴവര്‍ക്കിടയില്‍ പോലും വെള്ളാപ്പള്ളിക്ക് വേണ്ടത്ര അംഗീകാരമില്ലെന്നാണ് ഇപ്പോള്‍ ബിജെപി കണ്ടെത്തിയിരിക്കുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha