കേരളത്തില്‍ ഇടതുതരംഗം. തെരഞ്ഞെടുപ്പിന് തൊട്ടുമുമ്പുവരെ ഭരണത്തുടര്‍ച്ചയെ കുറിച്ചായിരുന്നു കേരളത്തില്‍ ചര്‍ച്ച. എന്നാല്‍ തെരഞ്ഞെടുപ്പ് ദിവസം മുതല്‍ ഭരണതുടര്‍ച്ച ഇടതുതരംഗത്തിന് വഴിമാറി. ജനങ്ങളാണ് നായകര്‍ എന്ന് കേരളം വീണ്ടും വിധിയെഴുതുകയായിരുന്നു.
യു.ഡി.എഫ് സര്‍ക്കാരിന്റെ അഴിമതിയായിരുന്നു തെരഞ്ഞെടുപ്പിലെ മുഖ്യചര്‍ച്ചാവിഷയം. ഭരണത്തിന്റെ അവസാന നാളുകളില്‍ പോലും ഭരണാധികാരികള്‍ വെറുതെയിരുന്നില്ല. കേരളത്തിന്റെ തനതായ ഭൂസമ്പത്ത് വിവിധ സംഘടനകള്‍ക്ക് പാട്ടത്തിനു കൊടുക്കുന്ന തിരക്കിലായിരുന്നു അവര്‍.
ബാര്‍ക്കോഴ മുഴുവന്‍ കെ.എം. മാണിയുടെ തലയില്‍ കെട്ടിവച്ച് രക്ഷപ്പെടാനുള്ള പരിശ്രമങ്ങള്‍ക്കേറ്റ തിരിച്ചടി കൂടിയാണ് തെരഞ്ഞെടുപ്പ് ഫലം. കെ. ബാബു പകല്‍മാന്യന്‍ മാത്രമാണെന്ന് തെരഞ്ഞെടുപ്പ് ഫലം തെളിയിച്ചു.
സരിതാനായരാണ് യു.ഡി.എഫിനെ കുരുക്കിയ ഒരു പ്രധാനി. സരിതാനായരും മുഖ്യമന്ത്രിയും തമ്മിലുള്ള ചിത്രങ്ങള്‍ പുറത്തുവന്നപ്പോള്‍ കേരളം നാണിച്ചു. സരിതയും മുഖ്യമന്ത്രിയുടെ കുടുംബവും ഒരേ പള്ളിയില്‍ പ്രാര്‍ത്ഥിക്കാന്‍ പോകുമെന്ന് കേട്ടപ്പോള്‍ അതിലേറെ നാണക്കേടുണ്ടായി. സരിതയുടെ ഭര്‍ത്താവായിരുന്ന ബിജു രാധാകൃഷ്ണന്‍ മുഖ്യമന്ത്രിയുമായി മണിക്കൂറുകള്‍ ചര്‍ച്ച നടത്തിയെന്ന വാര്‍ത്തയും നാണക്കേടുണ്ടാക്കി.
പി.സി. ജോര്‍ജിനെ വിശ്വാസത്തിലെടുത്ത ഉമ്മന്‍ചാണ്ടിയുടെ യശസ് ജോര്‍ജിനാല്‍ തന്നെ അവസാനിച്ചു. ജോര്‍ജിന്റെ പൂരപ്പാട്ടുകള്‍ കേട്ട് കേരളം തലകുനിച്ചു. ശെല്‍വരാജിനെ യു.ഡി.എഫ് പാളയത്തിലെത്തിച്ച ജോര്‍ജിന്റെ ബുദ്ധി ഉമ്മന്‍ചാണ്ടിയെ വീഴ്ത്തി.
ഇടതുതരംഗം ആഞ്ഞടിക്കുകയില്ലെന്ന ഉമ്മന്‍ചാണ്ടിയുടെ അമിതമായ ആത്മവിശ്വാസമാണ് അേദ്ദഹത്തിന് വിനയായത്. പകലന്തിയോളം അഴിമതിയും പിന്നാലെ കാരുണ്യവും നല്‍കിയാല്‍ ജനമെല്ലാം മറക്കുമെന്ന് ഉമ്മന്‍ചാണ്ടി കരുതിയത് വെറുതെയായി.
വി.എം. സുധീരനെ വിശ്വാസത്തിലെടുത്തിരുന്നെങ്കില്‍ സര്‍ക്കാരിന്റെ അവസ്ഥ ഇത്രത്തോളം വഷളാവുകയില്ലായിരുന്നു. എന്നാല്‍ ഉമ്മന്‍ചാണ്ടി ഒറ്റയ്ക്കു നടത്തിയ അശ്വമേധം പടുകുഴിയിലായെന്നുമാത്രം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha