സുരേഷ്‌രാജ് പുരോഹിതിനെ കേരള പോലീസ് അക്കാദമിയില്‍ നിന്നും രണ്ടു ദിവസത്തിനകം മാറ്റും. കേരള മനുഷ്യാവകാശ കമ്മീഷന്‍ ഐ.ജി.യായി അദ്ദേഹത്തെ നിയമിക്കുമെന്നറിയുന്നു.
പുരോഹിതാണ് തൃശൂര്‍ പോലീസ് അക്കാദമിയുടെ മേധാവി. ഇടതുമുന്നണി അധികാരം ഏറ്റെടുത്തയുടനെ പോലീസ് അക്കാദമിയില്‍ ഇടതു അനുഭാവികളായ പോലീസുകാര്‍ ബീഫ് വിളമ്പിയിരുന്നു. അക്കാദമിയുടെ കാന്റീനില്‍ ബീഫ് നിരോധനം നിലനില്‍ക്കെയായിരുന്നു ബീഫ് വിളമ്പിയത്. പുരോഹിതിനെതിരെ അക്കാദമിയില്‍ ഇടതു അനുഭാവികളായ ഉദേ്യാഗസ്ഥര്‍ നേരത്തേമുതല്‍ അസ്വാരസ്യത്തിലാണ്. പുരോഹിതിന്റെ പ്രായപൂര്‍ത്തിയാകാത്ത മകന്‍ വാഹനമോടിച്ച രംഗം ചിത്രീകരിച്ച് മാധ്യമങ്ങള്‍ക്ക് നല്‍കിയത് ഇടതു അനുഭാവികളായ ഉദേ്യാഗസ്ഥരാണെന്ന് ആരോപണം ഉയര്‍ന്നിരുന്നു. എന്നാല്‍ പുരോഹിതിനെതിരെ നടപടിയെടുക്കാന്‍ അന്നത്തെ സര്‍ക്കാര്‍ തയ്യാറായില്ല. ഇടതുസര്‍ക്കാര്‍ അധികാരത്തിലെത്തിയാലുടന്‍ നടപടിയെടുക്കുമെന്ന് ഉറപ്പായിരുന്നു.
പുരോഹിതിനെ നേരത്തെ മനുഷ്യാവകാശ കമ്മീഷനിലേക്ക് മാറ്റാന്‍ യു.ഡി.എഫ് സര്‍ക്കാര്‍ ആലോചിച്ചിരുന്നെങ്കിലും വേണ്ടെന്നു വച്ചിരുന്നു. പോലീസ് അക്കാദമിയിലെ മേധാവിക്ക് ക്രമസമാധാന രംഗത്ത് യാതൊരു റോളുമില്ല. അതുകൊണ്ടുതന്നെ അക്കാദമി അധ്യക്ഷനാക്കുന്നതാണ് നല്ലതെന്ന് ഉപദേശം ലഭിച്ചതിനെ തുടര്‍ന്നാണ് യു.ഡി.എഫ് സര്‍ക്കാര്‍ നടപടിയെടുക്കാത്തത്.
ഐ.ജി. എസ് ശ്രീജിത്ത് മനുഷ്യാവകാശ കമ്മീഷന്‍ ഐ.ജി. സ്ഥാനം ഒഴിഞ്ഞതിന് ശേഷം അവിടെ പകരം നിയമനം ആയിട്ടില്ല. ഇപ്പോള്‍ മനുഷ്യാവകാശ കമ്മീഷനില്‍ മാത്രമാണ് ഉയര്‍ന്ന തസ്തിക ഒഴിവുള്ളത്. ആഭ്യന്തരമന്ത്രി പിണറായിയായതിനാല്‍ ഇത്തരക്കാര്‍ക്കെതിരെ നടപടി ഉറപ്പാണ്. ബീഫ് വിളമ്പിയവര്‍ക്കെതിരെ നടപടിക്ക് നിര്‍ദ്ദേശിച്ചിരിക്കുകയാണ് പുരോഹിത് ഇപ്പോള്‍.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha