37 സംസ്ഥാനങ്ങളില്‍ നിന്നായി 650ലേറെ പേര്‍ക്ക് 'സാല്‍മൊണെല്ല' രോഗം സ്ഥിരീകരിച്ചു. യുഎസിലാണ് സംഭവം. ഉള്ളിയില്‍ നിന്നാണ് ഇത് പകരുന്നത് എന്നാണ് വിദഗ്ദര്‍ പറയുന്നത്. രോഗവ്യാപനത്തിന്റെ പശ്ചാത്തലത്തില്‍ സ്റ്റിക്കറോ പാക്കേജിംഗോ ഇല്ലാത്ത ചുവന്ന, വെള്ള, മഞ്ഞ ഉള്ളികള്‍ ഉപയോഗിക്കരുതെന്ന് സെന്റര്‍ ഫോര്‍ ഡിസീസ് കണ്‍ട്രോള്‍ ആന്‍ഡ് പ്രിവന്‍ഷന്‍ (സിഡിസി) മുന്നറിയിപ്പ് നല്‍കി.

മെക്സിക്കോയിലെ ചിഹുവാഹുവയില്‍ നിന്ന് ഇറക്കുമതി ചെയ്ത ഉള്ളിയിലാണ് രോഗ ഉറവിടം കണ്ടെത്തിയത്. പ്രോസോഴ്സ് ഇന്‍കോര്‍പ്പറേഷന്‍ വഴി ഇത് യുഎസില്‍ ഉടനീളം വിതരണം ചെയ്തിട്ടുണ്ടെന്ന് ആരോഗ്യ അധികൃതര്‍ പറയുന്നു.

രോഗം ബാധിച്ച 75 ശതമാനത്തിലധികം പേരും ഉള്ളി നേരിട്ടോ, ഉള്ളി അടങ്ങിയ വിഭവങ്ങളോ രോഗം ബാധിക്കുന്നതിന് മുമ്ബ് കഴിച്ചിരുന്നതായി സിഡിസി വ്യക്തമാക്കി.

129-ഓളം പേരെ ഇതുവരെ ആശുപത്രിയില്‍ പ്രവേശിപ്പിച്ചിട്ടുണ്ട്. അതോടൊപ്പം ഇതുവരെ മരണമൊന്നും റിപ്പോര്‍ട്ട് ചെയ്തിട്ടില്ലെന്നും സിഡിസി വ്യക്തമാക്കി. ഓഗസ്റ്റ്, സെപ്റ്റംബര്‍ മാസങ്ങളിലാണ് കൂടുതല്‍ കേസുകളും റിപ്പോര്‍ട്ട് ചെയ്തത്. ടെക്സസ്, ഒക്ലഹോമ എന്നിവിടങ്ങളിലാണ് കൂടുതല്‍ രോഗവ്യാപനം സ്ഥിരീകരിച്ചത്.