ആധുനിക ലോകം പലവിധ പ്രശ്‌നങ്ങളുടെ നടുവിലാണ്‌. വീട്ടിലെ കുഞ്ഞുകുഞ്ഞു പ്രശ്‌നങ്ങള്‍ മുതല്‍ ജോലി സ്ഥലം വരെ അതു നീളുന്നു. എല്ലാത്തിനും വില്ലനായി സാമ്പത്തികവും കാണും. എല്ലാം കൂടിയാകുമ്പോള്‍ ജീവിതം തന്നെ ആസ്വദിക്കാന്‍ മറന്നു പോകുന്നു. ഇതൊക്കെ ക്രമേണ കുടുംബ ബന്ധങ്ങളുടെ ശിഥിലീകരണത്തിന്‌ തന്നെ വഴിയൊരുക്കുന്നു.  മാനസികവും ശാരീരികവുമായ ഒരു വികാര പ്രകടനമാണ്‌ സെക്‌സ്‌. മനസിന്റെ തൃപ്‌തി, അവിടെയാണ്‌ സെക്‌സിന്റെ വിജയവും പരാജയവും. ഏതൊരു ബന്ധത്തിന്റേയും അടിസ്ഥാന ഘടകമാണ്‌ സ്‌നേഹം. സ്‌നേഹത്തിന്റെ വിവിധ ഭാവങ്ങളായ പ്രേമം, ശൃംഗാരം, കാമം എന്നിവയില്‍ തുടങ്ങി ലൈംഗിക ബന്ധത്തില്‍ അത്‌ പരിപൂര്‍ണതയിലെത്തുന്നു. പരസ്‌പര ബന്ധത്തിന്റെ ആഴം കൂട്ടി ദാമ്പത്യ ബന്ധങ്ങള്‍ ദൃഡമാക്കുന്നതില്‍ സെക്‌സിന്‌ പ്രധാന പങ്കാണുള്ളത്‌.
ലൈംഗിതയെപ്പറ്റി വ്യക്തമായ അറിവോ കാഴ്‌ചപ്പാടോ ഇല്ലാതെ ജീവിതത്തിലേക്ക്‌ കടക്കുന്നവരാണ്‌ അധികവും. ഇവിടെയാണ്‌ ലൈംഗിക വിദ്യാഭ്യാസത്തിന്റെ പ്രസക്തി. ഹൈസ്‌കൂള്‍തലം മുതല്‍ ലൈഗിക വിദ്യാഭ്യാസം കൊണ്ടുവരാനുള്ള ശ്രമങ്ങളും നടക്കുന്നുണ്ട്‌.
ദാമ്പത്യ ബന്ധത്തിന്റെ പരാജയമാണ്‌ പല വിവാഹ മോചനത്തിനും കാരണമായി പറയുന്നത്‌. പരസ്‌പരം അടുത്തറിയുക എന്നതാണ്‌ ദാമ്പത്യ ബന്ധത്തില്‍ ഏറ്റവും പ്രധാനം.
മനപ്പൊരുത്തം പോലെ ഒന്നാണ്‌ സെക്‌സും. വിവിധ ശൈലികള്‍ ഇഷ്‌ടപ്പെടുന്ന രണ്ടുപേര്‍ ചേരുമ്പോള്‍ അഭിപ്രായ വ്യത്യാസം സ്വാഭാവികം. പലര്‍ക്കും പല രീതിയിലുള്ള ലൈംഗിക ബന്ധത്തിനോടായിരിക്കും താത്‌പര്യം. പൊരുത്തക്കേടിനിടവരാതെ തങ്ങളുടെ ഇഷ്‌ടാനിഷ്‌ടങ്ങള്‍ തുറന്നു പറയുക. കഴിയുമെങ്കില്‍ സാധിച്ചുകൊടുത്ത്‌ പരസ്‌പരം തൃപ്‌തിയടയുക.
തുടര്‍ച്ചയായ പരാജയങ്ങളോ പൂര്‍ണ തൃപ്‌തി ലഭിക്കാത്തതോ ആണ്‌ പലരുടേയും പ്രശ്‌നം. തനിക്കത്‌ കഴിയില്ല എന്ന മാനസികാവസ്ഥ മാറ്റണം.
കിടപ്പറയില്‍ തത്‌കാലം എല്ലാ വിഷമതകളും മാറ്റിവയ്‌ക്കാം. ഓരോ രാത്രിയും ആദ്യ രാത്രിയായി കാണണം. പുതുമകള്‍ മനസിന്‌ എപ്പോഴും തൃപ്‌തി നല്‍കും. സെക്‌സിന്റെ കാര്യത്തില്‍ ആരും യാചകരാവേണ്ട കാര്യമില്ല. രാജകീയമായി തന്നെ സെക്‌സ്‌ ആസ്വദിക്കാം. എന്നും ഒരേ രീതി ആവര്‍ത്തിക്കാതെ പുതിയ ഭാവനയിലൂടെ സെക്‌സിനെ വിശിഷ്‌ടമാക്കാം. സെക്‌സ്‌ ഒരാഘോഷമാണ്‌. ആഘോഷത്തില്‍ മറ്റൊരു ദുരിതത്തിനും സ്ഥാനമില്ല. പരമാവധി തൃപ്‌തി, അവിടെയാണ്‌ ഓരോ വിജയവും.