ശരീരത്തിലെ ഏറ്റവും വിസ്താരമേറിയ അവയവമാണു ചര്‍മം. ചര്‍മത്തെ ബാധിക്കുന്ന നിരവധി രോഗങ്ങളുണ്ട്. എന്നാല്‍ ചര്‍മ രോഗങ്ങളില്‍ ചിലതെങ്കിലും ആന്തരികാവയവങ്ങളുടെ രോഗത്തിന്റെ ബാഹ്യലക്ഷണമായിരിക്കും. പല ഉള്‍രോഗങ്ങളുടെയും ലക്ഷണങ്ങള്‍ ചര്‍മത്തില്‍ മാസങ്ങള്‍ക്കോ വര്‍ഷങ്ങള്‍ക്കോ മുമ്പോ പ്രത്യക്ഷപ്പെട്ടെന്നിരിക്കാം.

ശരീരം മുഴുവനായുണ്ടാകുന്ന അസഹ്യമായ ചൊറിച്ചില്‍ ഭാവിയില്‍ വരാനിരിക്കുന്ന അര്‍ബുദങ്ങള്‍, പ്രത്യേകിച്ച് ലിംഫോമ (lymphoma)യുടെ ലക്ഷണമാകാം. ഈ രോഗികളെ വിശദമായി പരിശോധിച്ചാലും തുടക്കത്തില്‍ രോഗനിര്‍ണയം സാധ്യമാകണമെന്നില്ല. ഇടയ്ക്കിടെ പരിശോധനയ്ക്കു വിധേയമാക്കി, രോഗമൊന്നുമില്ലെന്നുറപ്പാക്കണം.

വൃക്കരോഗികളില്‍ യൂറിയ (urea), ക്രിയാറ്റിന്‍ (creatin) എന്നീ മാലിന്യങ്ങള്‍ രക്തത്തില്‍ കൂടുന്നതിനാലും കരള്‍ രോഗികളില്‍ ബൈല്‍ സാള്‍ട്ട് (bile salt), ബൈല്‍ പിഗ്മെന്റ് (bile pigment) എന്നിവയുടെ അളവു വര്‍ധിക്കുന്നതിനാലും ശരീരമാസകലം അസഹ്യമായ ചൊറിച്ചില്‍ അനുഭവപ്പെടാം. രക്തത്തില്‍ ചുവന്ന രക്താണുക്കള്‍ കൂടുന്ന രോഗം (polycythemia) ബാധിച്ചവരിലുണ്ടാകുന്ന ചൊറിച്ചില്‍ കുളിച്ചു കഴിയുമ്പോള്‍ കൂടുതല്‍ അനുഭവപ്പെടുന്നതായി കാണുന്നു.

ഉള്‍രോഗങ്ങള്‍ ചികിത്സിക്കാം. ചൊറിച്ചിലിനു താല്‍ക്കാലിക ശമനം കിട്ടാന്‍ പലതരം മരുന്നുകള്‍ കഴിക്കാനും പുരട്ടാനും ലഭ്യമാണ്. മെന്‍ഥോള്‍ (menthol), കാംഫര്‍ (camphor), ഡൈഫെന്‍ ഹൈഡ്രാമിന്‍ (diphen hydramine), കലാമിന്‍ (calamine) എന്നിവ അടങ്ങിയ ലേപനങ്ങളാണു പൊതുവെ കൊടുക്കുന്നത്. എന്നാല്‍ ചൊറിച്ചിലിനു കാരണമാകുന്ന ഉള്‍രോഗങ്ങള്‍ കണ്ടെത്തി ചികിത്സിക്കാന്‍ പ്രത്യേകം ശ്രദ്ധിക്കണം.

കൊഴുപ്പുകള്‍ ചര്‍മത്തിലടിയുമ്പോള്‍ രക്തത്തില്‍ കൊളസ്‌ട്രോള്‍ പോലുള്ള കൊഴുപ്പുകള്‍ കൂടുന്ന രോഗം വര്‍ധിച്ചുവരികയാണ്. പ്രധാന അവയവങ്ങളായ വൃക്ക, ഹൃദയം, തലച്ചോര്‍ എന്നിവിടങ്ങളിലെ രക്തക്കുഴലുകളില്‍ ഈ കൊഴുപ്പുകള്‍ വന്നടിയുമ്പോഴാണ് ഹൃദയാഘാതം, പക്ഷാഘാതം എന്നിവയുണ്ടാകുന്നത്. ഈ കൊഴുപ്പുകള്‍ തൊലിയില്‍ ചില ഭാഗങ്ങളിലും വന്നടിയാറുണ്ട്.

രക്തത്തിലെ കൊഴുപ്പു ചികിത്സിച്ചു മാറ്റിയാലും തൊലിയില്‍ നിന്ന് ഇവ അപ്രത്യക്ഷമാകണമെന്നില്ല. കണ്ണിനു ചുറ്റിലും കണ്‍പോളയിലും മഞ്ഞനിറത്തിലുള്ള തടിപ്പുകളും (xenthelasma), സന്ധികള്‍ക്കു ചുറ്റുമുള്ള തൊലിയില്‍ നെല്ലിക്കാവലുപ്പമുള്ള മുഴകളും (xenthoma tubersorum) കാണാം. എന്നാല്‍ ഇവയ്ക്കു ചോറിച്ചിലോ വേദനയോ ഉണ്ടാകില്ല. കാര്‍ബോളിക് ആസിഡ് (carbolic acid), െ്രെടക്ലോറോ അസറ്റിക് ആസിഡ് (trichloro acetic acid) എന്നിവ പുരട്ടിയും ലേസര്‍ (laser), ഇലക്ട്രോ കോട്ടറി (electro cautery) എന്നിവ വഴിയും ഇവ കരിച്ചുകളയാന്‍ സാധിക്കും.

തൊലി കറുത്തു തടിച്ചാല്‍ വണ്ണം കൂടുതലുള്ളവരില്‍ കഴുത്തിനു പിന്‍ഭാഗം, കക്ഷം. തുടയിടുക്ക് എന്നിവിടങ്ങളിലെ തൊലി കറുത്ത് കട്ടികൂടി വെല്‍വെറ്റ് പോലിരിക്കും. ഇതാണ് അക്കാന്തോസിസ് നൈഗ്രിക്കന്‍സ് (acanthosis nigricans). പിറ്റിയൂട്ടറി, തൈറോയ്ഡ്, അഡ്രീനല്‍ എന്നീ എന്‍ഡോെ്രെകന്‍ ഗ്രന്ഥികളുടെ പ്രവര്‍ത്തനത്തകരാറു കൊണ്ടും ഇതു സംഭവിക്കാം. പക്ഷേ, വളരെ പ്രായമായവരില്‍ , ഇത് ആദ്യമായി പ്രത്യക്ഷപ്പെടുകയാണെങ്കില്‍ ശ്രദ്ധിക്കണം. അത് വയറിനുള്ളിലെ കാന്‍സറുകളുടെ (കാന്‍സിനോമ സ്‌റ്റൊമ്ക്, കോളണ്‍ (cansinoma stomach, colon) എന്നിവയുടെ ലക്ഷണമായിരിക്കാം. ഇത്തരം രോഗികള്‍ക്കു വിദഗ്ധ പരിശോധന ആവശ്യമാണ്.

സാലിസിലിക് ലേപനങ്ങള്‍ അക്കാന്തോസിസ് നൈഗ്രിക്കന്‍സിന് പരിഹാരമായി സാലിസിലിക് ആസിഡ് അടങ്ങിയ ലേപനങ്ങള്‍ പുരട്ടാം.