ഓട്‌സ് ഇന്ന് നമ്മള്‍ സര്‍വ്വസാധാരണമായി ഉപോയിഗിക്കുന്ന ഒന്നാണ്. ധാരാളം ആരോഗ്യഗുണങ്ങളുള്ള ഓട്‌സില്‍ വൈറ്റമിനുകള്‍, മിനറല്‍, ആന്റിക്‌സിഡന്റ് എന്നിവയും നാരുകളുമുണ്ട്. ഇവയില്‍ സോഡിയം നന്നെ കുറവാണ്. ഓട്‌സില്‍ കൂടുതല്‍ എനര്‍ജി കിട്ടുന്നത് കാര്‍ബോഹൈഡ്രേറ്റില്‍ നിന്നാണ്. 66% കാര്‍ബോഹൈഡ്രേറ്റ് അടങ്ങിയിട്ടുള്ള ഓട്‌സില്‍ 11% വും നാരുകളാണ്. ഓട്‌സിന്റെ ഒട്ടുമിക്ക ഗുണങ്ങള്‍ക്കും കാരണം ഇവയിലെ നാരുകളില്‍ ഒന്നായ ബീറ്റ ഗ്ലൂക്കനാണ്. ദഹനത്തെ ത്വരിതപ്പെടുത്തി വിശപ്പുമാറിയെന്ന തോന്നല്‍ ഉണ്ടാക്കാനും വിശപ്പടക്കാനുമുള്ള കഴിവും ഓട്‌സിനുണ്ട്. ബീറ്റ ഗ്ലൂക്കന് ജെല്‍ പോലെയുള്ള സൊല്യൂഷന്‍ ഉണ്ടാക്കാനുള്ള കഴിവാണ് ഇതിനു സഹായിക്കുന്നത്. ഓട്‌സ് ധാന്യത്തില്‍ 2.3 - 8-5% വരെ ബീറ്റ ഗ്ലൂക്കന്‍ അടങ്ങിയിട്ടുണ്ട്.

ബീറ്റ ഗ്ലൂക്കന് കൊളസ്‌ട്രോള്‍ നിയന്ത്രിക്കാനുള്ള കഴിവുമുണ്ട്. ഫാറ്റിന്റെയും കൊളസ്‌ട്രോളിന്റെയും ആഗിരണം കുറച്ച് ഡൈജസ്റ്റീവ് കണ്ടന്റിന്റെ വിസ്‌കോസിറ്റി കൂട്ടിയും ബൈല്‍ ആസിഡിന്റെ പുറംതള്ളല്‍ കൂട്ടുകയും ചെയ്താണ് കെളസ്‌ട്രോള്‍ കുറയ്ക്കുന്നത്. 3gm ബീറ്റ ഗ്ലൂക്കന്‍ നിത്യവും കഴിക്കുന്നത് ചീത്ത കൊളസ്‌ട്രോള്‍ കുറയ്ക്കാനും ഹൃദയത്തിന്റെ ആരോഗ്യം സംരക്ഷിക്കാനും ഉത്തമമാണ്. ഓട്‌സിന്റെ നാരുകള്‍ക്കു പ്രമേഹത്തെ നിയന്ത്രിക്കാന്‍ പറ്റും എന്നു പറയുന്നുണ്ടെങ്കിലും അത്താഴമായി ഓട്‌സ് മീലിന്റെ പായസമോ കഞ്ഞിയോ കഴിക്കുന്നത് ഇന്‍സുലിന്‍ എടുക്കുന്ന പ്രമേഹരോഗികളില്‍ രാത്രികാലങ്ങളില്‍ ഷുഗര്‍ കുറഞ്ഞുപോകുന്നതായി കാണാറുണ്ട്.