കൊറോണ വ്യാപനത്തെ തുടർന്ന് ഏർപ്പെടുത്തിയ നിയന്ത്രണങ്ങൾ തുടരുന്നതിനിടെ സൗദി അറേബ്യയിൽ നിന്നും ഇന്ത്യയിലേക്ക് 101 വന്ദേഭാരത് മിഷൻ സർവീസുകൾ ഇന്ത്യൻ എംബസി പ്രഖ്യാപിച്ചിരിക്കുകയാണ്. നാട്ടിൽ എത്തിച്ചേരാൻ കാത്തിരിക്കുന്ന പ്രവാസികൾക്ക് ഒരു സന്തോഷ വാർത്തയാണ് പുറത്തേക്ക് വരുന്നത്. കേരളത്തിലേക്കുള്ള 50 സർവീസുകൾ ഉൾപ്പെടെയാണ് ഇത്രയും സർവീസുകൾ ഷെഡ്യൂൾ ചെയ്തിട്ടുള്ളത്. നവംബർ ഒൻപത് മുതൽ ഡിസംബർ 30വരെയുള്ള ഷെഡ്യൂളുകളാണ് എംബസി വെബ്‌സൈറ്റ് വഴി പുറത്തുവിട്ടത്. പ്രവാസി മലയാളികൾ ഏറെയുള്ള ദമ്മാമിൽ നിന്നും 31ഉം റിയാദിൽ നിന്നും 11 സർവീസും ജിദ്ദയിൽ നിന്ന് എട്ട് സർവീസുകളുമാണ് കേരളത്തിലേക്ക് നൽകിയിട്ടുള്ളത്. നവംബർ 11, 18, 25 ദിവസങ്ങളിൽ ദമ്മാമിൽ നിന്നും, ഡിസംബർ 6, 13, 20, 27 തീയതികളിൽ ഓരോ സർവീസും നവംബർ 15, 22, 29 തീയതികളിൽ രണ്ട് വീതം സർവീസുകളും കൊച്ചിയിലേക്ക് ഉണ്ടാകുന്നതാണ്.

നവംബർ 9, 11, 12, 16, 18, 19, 23, 25, 26, 30 ഡിസംബർ 2, 9, 16, 23, 30 തീയതികളിൽ തിരുവനന്തപുരത്തേക്കും നവംബർ 13, 20, 27 തീയതികളിൽ കോഴിക്കോട്ടേക്കും സർവീസുകൾ ഉണ്ടാകുമെന്ന് ഇന്ത്യൻ എംബസി വ്യക്തമാക്കുകയുണ്ടായി.

അതേസമയം റിയാദിൽ നിന്നും നവംബർ 13, ഡിസംബർ 13, ഡിസംബർ 2, ഡിസംബർ രണ്ട്, 9, 16, 23, 30 തീയതികളിൽ ഓരോന്നും നവംബർ 18,25 തീയതികളിൽ രണ്ട് വീതം സർവീസുകൾ തിരുവനന്തപുരത്തേക്കും കണ്ണൂരിലേക്ക് നവംബർ പതിനൊന്നിനും കണ്ണൂരിലേക്ക് ഒരു സർവീസുകൾ ഉണ്ട്. കൊച്ചി, കണ്ണൂർ, തിരുവനന്തപുരം വിമാനത്താവളങ്ങളിലേക്കാണ് സർവീസുകൾ നിലവിൽ ലഭ്യമാക്കിയിട്ടുള്ളത്. റിയാദിൽ നിന്നും കോഴിക്കോട്ടേക്കും കൊച്ചിയിലേക്കും സർവീസുകൾ ലഭ്യമല്ല. എന്നാൽ ജിദ്ദയിൽ നിന്ന് കോഴിക്കോട്ടേക്ക് മാത്രമാണ് സർവീസുകൾ.

അതോടൊപ്പം തന്നെ 101 സര്‍വിസുകളില്‍ 74 എണ്ണം എയര്‍ ഇന്ത്യയും 27 എണ്ണം എയര്‍ ഇന്ത്യ എക്സ്പ്രസ്‌ വിമാനങ്ങളുമാണ്. ഈ വിമാനങ്ങളില്‍ യാത്ര ചെയ്യാന്‍ ആഗ്രഹിക്കുന്നവര്‍ക്ക് എയര്‍ ഇന്ത്യ ഓഫീസിൽ നേരിട്ടെത്തി ടിക്കറ്റുകള്‍ വാങ്ങാൻ സാധിക്കും. എയര്‍ ഇന്ത്യ എക്സ്പ്രസ് ടിക്കറ്റുകള്‍ വെബ്സൈറ്റ് വഴിയും ലഭ്യമാണ്. യാത്രക്കാര്‍ ഇന്ത്യന്‍ എംബസി വെബ്സൈറ്റില്‍ പേര് രജിസ്റ്റര്‍ ചെയ്തവരായിരിക്കണമെന്നും ആദ്യം വരുന്നവര്‍ക്ക് ആദ്യ മുന്‍ഗണന എന്ന ക്രമത്തിലാവും ടിക്കറ്റ് വില്‍പ്പനയെന്നും ഇന്ത്യന്‍ എംബസി അറിയിക്കുകയുണ്ടായി.