പലരുടെയും അശ്രദ്ധമൂലം ചിന്തിക്കുകപോലും ചെയ്തിട്ടില്ലാത്ത സംഭവങ്ങളാണ് ഉണ്ടാകുന്നത്. അത്തരത്തിൽ ദുബായിൽ പ്രവാസികളെ ഞെട്ടലിലാഴ്ത്തി ഒരു സംഭവം ഉണ്ടായിരിക്കുകയാണ്. ഉറക്കത്തിനിടെ അമ്മയുടെ മുടി കഴുത്തിൽ കുരുങ്ങി ശ്വാസം മുട്ടിയ കുഞ്ഞിനെ അവസാനം മുടി മുറിച്ചാണ് രക്ഷപ്പെടുത്തിയത്. കഴിഞ്ഞ ദിവസം പുലർച്ചെ രണ്ടിനാണ് സംഭവം നടന്നത്. എഴുത്തുകാരനും ദുബായിൽ ഉദ്യോഗസ്ഥനുമായ അസിയുടെയും ഷെഹിയുടെയും മകൾ ഒരുവയസ്സുള്ള ഷസയാണ് അത്ഭുതകരമായി രക്ഷപ്പെട്ടത്.

ദുബായ് അൽബദായിലെ ഇവരുടെ വില്ലയിൽ ഇരുവരുടെയും നടുവിൽ കിടക്കുകയായിരുന്ന കുഞ്ഞിന്റെ കഴുത്തിലാണ് ഷെഹിയുടെ തലമുടി കുരുങ്ങിയത്. ഉറക്കത്തിൽ കിടന്ന് ഉരുളാറുള്ള കുട്ടിയുടെ കഴുത്തിൽ മുടി കുരുങ്ങുകയായിരുന്നുവെന്നാണ് പറഞ്ഞത്. കുഞ്ഞിന് എതിരേ കിടന്ന ഷെഹിക്ക് തിരിയാൻ ബുദ്ധിമുട്ട് തോന്നിയിരുന്നു. തിരിയാൻ ശ്രമിച്ചപ്പോഴെല്ലാം കുഞ്ഞ് വല്ലാതെ കരഞ്ഞതോടെയാണ് പന്തികേടു തോന്നി ഭർത്താവിനെ വിളിച്ചുണർത്തിയത്.

ഇതേതുടർന്ന് മൊബൈലിന്റെ വെട്ടത്തിൽ പരിശോധിച്ചപ്പോൾ കുഞ്ഞിന്റെ കഴുത്തിൽ മുടി കുരുങ്ങിക്കിടക്കുന്നതാണ് കണ്ടതെന്ന് അസി പറഞ്ഞു. മുടിയുടെ കുരുക്ക് അഴിക്കാൻ ശ്രമിച്ചതോടെ കെട്ട് വീണ്ടും മുറുകിയിരുന്നു. തുടർന്ന് മുടി മുറിച്ചു കളഞ്ഞ് രക്ഷപ്പെടുത്തുകയാണ് ചെയ്തത്. ഒന്നു തിരിഞ്ഞാൽ കുഞ്ഞിന്റെ ജീവൻ അപകടത്തിലാകുമായിരുന്നു. ഉറക്കത്തിലായിരുന്ന തന്നെ ഭാര്യ വിളിച്ചുണർത്തിയതിനാലാണ് രക്ഷിക്കാൻ കഴിഞ്ഞതെന്നും അസി പറഞ്ഞു. ഇങ്ങനെയും അപകടം ഉണ്ടാകുമെന്ന് ഇപ്പോഴാണ് മനസ്സിലായതെന്നും അമ്മമാരെല്ലാം ശ്രദ്ധിക്കണമെന്നും അസി പറയുകയുണ്ടായി. തിരൂർ സ്വദേശിയാണ് അസി. പെരുമ്പിലാവ് സ്വദേശിനിയാണ് ഷെഹി.