ബഹ്റൈൻ പ്രധാനമന്ത്രി പ്രിൻസ് ഖലീഫ ബിൻ സൽമാൻ അൽ ഖലീഫയുടെ വേർപാടിൽ സ്വദേശി ജനതയോടൊപ്പം ദു:ഖം പങ്കിട്ട് പ്രവാസികളും; മനുഷ്യത്വപരവും സ്നേഹാർദ്രവുമായ നിലപാടുകൾ കൊണ്ട് പ്രവാസികൾക്കും ഏറെ പ്രിയങ്കരനായിരുന്ന നേതാവ്
കൊറോണ നൽകിയ മുറിവുകൾ ഉണങ്ങും മുന്നേ തന്നെ പ്രവാസലോകത്ത് തീരാനഷ്ടങ്ങളാണ് ഉണ്ടാകുന്നത്. ബഹ്റൈൻ പ്രധാനമന്ത്രി പ്രിൻസ് ഖലീഫ ബിൻ സൽമാൻ അൽ ഖലീഫയുടെ വേർപാടിൽ സ്വദേശി ജനതയോടൊപ്പം ദു:ഖം പങ്കിടുകയാണ് രാജ്യത്തെ പ്രവാസികളും. മനുഷ്യത്വപരവും സ്നേഹാർദ്രവുമായ നിലപാടുകൾ കൊണ്ട് പ്രവാസികൾക്കും ഏറെ പ്രിയങ്കരനായിരുന്നു ഈ ഭരണാധികാരി.
പല ഘട്ടങ്ങളിലും പ്രവാസികൾക്ക് സഹായകരമായി നിലകൊണ്ട ഭരണാധികാരി വിടവാങ്ങുമ്പോൾ രാജ്യത്തെ ഇന്ത്യക്കാരും സ്വദേശികളോടൊപ്പം ഏറെ ദു:ഖം അനുഭവിക്കുന്നുണ്ട്. ഏതൊരു സാഹചര്യത്തിലും ഏവരിലും കാരുണ്യവും സഹാനുഭൂതിയും പ്രകടമാക്കുന്നതായിരുന്നു അദ്ദേഹത്തിന്റെ നിലപാടുകൾ. ക്ഷയരോഗ ബാധിതയായി മരിച്ച ഭാര്യയുടെ മൃതദേഹം ചുമക്കേണ്ടി വന്ന് നിസ്സഹായതയുടെ പ്രതീകമായിത്തീർന്ന ഒഡീഷയിലെ ദനാ മജ്ഹിയുടെ വാർത്ത പ്രാദേശിക അറബ് പത്രം റിപ്പോർട്ട് ചെയ്ത ഉടൻ തന്നെ ഇന്ത്യൻ എംബസിയുമായി ബന്ധപ്പെട്ട് ആ കുടുംബത്തെ സഹായിക്കാൻ അദ്ദേഹം രംഗത്ത് എത്തുകയും ചെയ്തു. ദുരിതമനുഭവിച്ച നിരവധി പ്രവാസികൾക്ക് നാടണയുന്നതിനും വിവിധ സന്ദർഭങ്ങളിലായി അദ്ദേഹത്തിന്റെ ഇടപെടലുകളുണ്ടായി.
ഷെയ്ഖ് ഖലീഫയുടെ നിര്യാണത്തിൽ യുഎഇ ഭരണാധികാരികളായ പ്രസിഡന്റ് ഷെയ്ഖ് ഖലീഫ ബിൻ സയിദ് അൽ നഹ്യാൻ, വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് അൽ മക്തും, ഷെയ്ഖ് മുഹമ്മദ് ബിൻ സയിദ് അൽ നഹ്യാൻ എന്നിവർ അനുശോചനം രേഖപ്പെടുത്തുകയുണ്ടയായി. ഫുജൈറ ഭരണാധികാരി ഷെയ്ഖ് ഹമദ് ബിൻ മുഹമ്മദ് അൽ ഷർഖിയും അനുശോചനം അറിയിക്കുകയുണ്ടായി.
https://www.facebook.com/Malayalivartha