ബോട്ടപകടത്തിൽ ഇടതുവശം തളരുകയും ഇടതുകാൽ മുറിക്കേണ്ടി വരികയും ചെയ്തയാൾക്കു 10 ലക്ഷം ദിർഹം അതായത് 2 കോടി രൂപ നഷ്ടപരിഹാരം നൽകാൻ അബുദാബി പ്രാഥമിക കോടതി ഉത്തരവിടുകയുണ്ടായി. അപകടം മൂലം ശാരീരികവും മാനസികവുമായി ഉണ്ടായ നഷ്ടത്തിന് ഒരു കോടി ദിർഹം ആവശ്യപ്പെട്ടു പരുക്കേറ്റയാൾ നൽകിയ കേസിലാണ് ഇപ്പോൾ വിധി വന്നിരിക്കുന്നത്.

അതേസമയം കോടതി വിധിപ്രകാരം ബോട്ടിന്റെ ക്യാപ്റ്റനും ഇൻഷൂറൻസ് കമ്പനിയും ചേർന്നാണു നഷ്ടപരിഹാരം നൽകേണ്ടത്. അബുദാബി ബീച്ചിൽ ജെറ്റ്സ്കി ഓടിക്കവേ ബോട്ട് ഇടിച്ചായിരുന്നു അപകടം നടന്നത്. അശ്രദ്ധയോടെ ബോട്ട് ഓടിച്ച് അപകടമുണ്ടാക്കിയ ക്യാപ്റ്റന് 2 മാസം തടവും 5000 ദിർഹം പിഴയും വിധിക്കുകയും ചെയ്തു. എന്നാൽ പരുക്കേറ്റയാൾ ഏതു രാജ്യക്കാരനാണെന്ന് ഇതുവരെ വെളിപ്പെടുത്തിയിട്ടില്ല.