വരാനിരിക്കുന്നത് ആഘോഷനാളുകളാണ്. ദീപാവലി, ക്രിസ്മസ് ഉള്‍പ്പെടെ വരാനിരിക്കുന്ന അവധിക്കാലത്ത് നാട്ടിലോ യുഎഇയിലോ ഉള്ള ബന്ധുക്കളെയോ സുഹൃത്തുക്കളെയോ വീട്ടിലേക്ക് ക്ഷണിച്ച് വിരുന്ന് നല്‍കാന്‍ ഉദ്ദേശ്യമുണ്ടെങ്കിൽ സൂക്ഷിക്കണം. ഈ കാര്യങ്ങള്‍ ശ്രദ്ധിക്കാതെ പോവരുത്. കൊവിഡ് നിയന്ത്രണ നടപടികളുടെ ഭാഗമായി ശക്തമായ വ്യവസ്ഥകളാണ് ദുബായ് ഭരണകൂടം ഏര്‍പ്പെടുത്തിയിരിക്കുന്നത്. എന്നാൽ തന്നെയും ആഘോഷനാളുകളിൽ ഓഫാറുകളുടെ പെരുമഴയും വിവിധതരത്തിൽ പരിപാടികളുമാണ് ദുബായ് ഒരുക്കിയിട്ടുള്ളത്. ഒപ്പം കൊവിഡ് പ്രമാണിച്ച് ചടങ്ങുകളില്‍ 12 ഇന മുന്‍കരുതലുകള്‍ നടപടികള്‍ സ്വീകരിക്കണമെന്നാണ് ദുബായ് ഹെല്‍ത്ത് അതോറിറ്റിയുടെ മുന്നറിയിപ്പ്.

1. വീട്ടിലോ ടെന്റിലോ ആണെങ്കില്‍ പരമാവധി 30 പേര്‍ മാത്രമേ പാടുള്ളൂ. ഹോട്ടലിലോ ബാള്‍ റൂമിലോ ആണെങ്കില്‍ 200 പേര്‍. പക്ഷെ, ഒരു നിബന്ധനയുണ്ട്. ചുരുങ്ങിയത് രണ്ടു മീറ്റര്‍ സാമൂഹ്യ അകലം പാലിച്ചുകൊണ്ട് നില്‍ക്കാന്‍ പറ്റുന്ന കെട്ടിടത്തില്‍ മാത്രമേ ഇത്രയും പേരെ അനുവദിക്കുകയുള്ളു. കെട്ടിടത്തിന് വലിപ്പം കുറവാണെങ്കില്‍ അതിനനുസൃതമായി ആളുകളുടെ എണ്ണവും കുറയ്‌ക്കേണ്ടതാണ്. അതായത് ചെറിയൊരു മുറിക്കകത്ത് 30 പേരെ അനുവദിക്കില്ല എന്നത് തന്നെ.

2. ചടങ്ങുകള്‍ നാലു മണിക്കൂറിലേറെ നീളരുത്.

3. കെട്ടിടത്തിലേക്ക് ആവശ്യത്തിന് വായു സഞ്ചാരമുണ്ടാകണം. ശരിയായ വെന്റിലേഷന്‍ ഇല്ലാത്ത വീടുകളാണെങ്കില്‍ കൂടുതല്‍ പേര്‍ പങ്കെടുക്കുന്ന ചടങ്ങുകള്‍ പാടില്ല.

4. പരമാവധി ഡിസ്‌പോസബ്ള്‍ ഗ്ലാസ്സുകളിലും പ്ലേറ്റുകളിലും വേണം ഭക്ഷണ സാധനങ്ങള്‍ നല്കാൻ. ഒരാള്‍ ഉപയോഗിച്ച പാത്രം മറ്റൊരാള്‍ ഉപയോഗിക്കുന്നത് വൈറസ് ബാധയ്ക്കുള്ള സാധ്യത വര്‍ധിപ്പിക്കുമെന്നതിനാലാണിത് ചെയ്യുന്നത്.

5. വിരുന്നുകളില്‍ ഭക്ഷണം വിളമ്പുമ്പോള്‍ ബുഫെ സമ്പ്രദായം ഒഴിവാക്കേണ്ടതാണ്. ഒരു പാത്രത്തില്‍ നിന്ന് ആളുകള്‍ ഭക്ഷണം എടുത്തുകഴിക്കുന്നത് വൈറസ് പകരാന്‍ സാധ്യത ഉണ്ടാകും. ഇതൊഴിവാക്കാന്‍ ഓരോരുത്തര്‍ക്കും വെവ്വേറ പാത്രങ്ങളില്‍ ഭക്ഷണം നല്‍കണം.

6. വിരുന്നും ചടങ്ങുകളും നടക്കുന്ന സ്ഥലങ്ങള്‍ ഇടയ്ക്കിടെ അണുവിമുക്തമാക്കാന്‍ ശ്രദ്ധിക്കേണ്ടതാണ്. ഇതിനുള്ള ലോഷനുകള്‍ മുന്‍കൂട്ടി കരുതണം.

7. ചടങ്ങുകളില്‍ പങ്കെടുക്കുന്നവര്‍ സമ്മാനങ്ങളോ ഉപഹാരങ്ങളോ പരസ്പരം കൈമാറാന്‍ പാടുള്ളതല്ല.

8. പനിയോ ശ്വാസകോശ സംബന്ധമായ എന്തെങ്കിലും അസുഖങ്ങളോ ഉള്ളവര്‍ പാര്‍ട്ടികളില്‍ പങ്കെടുക്കരുത്.

9. ചടങ്ങ് നടന്നുകൊണ്ടിരിക്കുമ്പോഴാണ് ഇത്തരം പ്രശ്‌നങ്ങള്‍ ശ്രദ്ധയില്‍പ്പെട്ടതെങ്കില്‍ ഉടന്‍ തന്നെ ചടങ്ങ് നടക്കുന്ന സ്ഥലത്തുനിന്ന് മാറിനില്‍ക്കേണ്ടതാണ്.

10. ഒപ്പം ചടങ്ങില്‍ പങ്കെടുക്കുന്നവര്‍ പരസ്പരം കൈകൊടുക്കുയോ ആലിംഗനം ചെയ്യുകയോ ചുംബിക്കുകയോ ചെയ്യരുത്. പകരം ദൂരെ നിന്ന് കൈവീശിക്കാണിച്ചാല്‍ മതി.

11. പ്രായമായവര്‍, രോഗബാധിതര്‍ തുടങ്ങിയവര്‍ ചടങ്ങുകളില്‍ പരമാവധി പങ്കെടുക്കരുത് .

12. മാസ്‌ക് ധാരണം, കൈകളുടെ ശുചീകരണം, സാമൂഹിക അകലം പാലിക്കല്‍ തുടങ്ങിയ കൊവിഡ് പെരുമാറ്റച്ചട്ടങ്ങള്‍ പൂര്‍ണമായി പാലിച്ചുവേണം ചടങ്ങുകള്‍ ഒരുക്കാൻ.