ചെറിയ പെരുന്നാൾ ഒരുക്കങ്ങളിലേക്ക് കടക്കുകയാണ് ഗൾഫ് രാഷ്ട്രങ്ങൾ. ഇതിനോടകം തന്നെ ഏവർക്കും കൊറോണ ജാഗ്രത കൈവിടാതെ തന്നെ ഇളവുകൾ നൽകുകയാണ് അധികൃതർ. ചെറിയ പെരുന്നാള്‍ അവധിക്കാലത്ത് അബുദാബിയില്‍ പാര്‍ക്കിങ് ഫീസ് ഈടാക്കുകയില്ലെന്ന് അധികൃതര്‍ അറിയിക്കുകയുണ്ടായി. ആയതിനാൽ തന്നെ ഇക്കാലയളവില്‍ ടോള്‍ ഗേറ്റുകളിലും ചാര്‍ജുകള്‍ ഉണ്ടാകുന്നതല്ല. ഞായറാഴ്‍ചയാണ് അബുദാബി മുനിസിപ്പാലിറ്റീസ് ആന്റ് ട്രാന്‍സ്‍പോര്‍ട്ട് വകുപ്പിന് കീഴിലുള്ള ഇന്റഗ്രേറ്റഡ് ട്രാന്‍സ്‍പോര്‍ട്ട് സെന്റര്‍ ഇത് സംബന്ധിച്ചുള്ള അറിയിപ്പ് പുറപ്പെടുവിച്ചത്.

മേയ് 11 മുതല്‍ ഔദ്യോഗിക അവധി ദിനങ്ങള്‍ അവസാനിക്കുന്നതു വരെ (റമദാന്‍ 29 മുതല്‍ ശവ്വാല്‍ 3 വരെ) പാര്‍ക്കിങ് സ്ഥലങ്ങള്‍ സൗജന്യമായി ഉപയോഗിക്കാനാവുന്നതാണ് മുസഫ ഇന്‍ഡസ്‍ട്രിയല്‍ ഏരിയയിലെ എം18 പാര്‍ക്കിങ് ലോട്ടും ഈ അവധിക്കാലത്ത് സൗജന്യമായി തന്നെ ലഭിക്കുന്നതായിരിക്കും. ഇതുകൂടാതെ താമസക്കാര്‍ക്കായി മാത്രം നീക്കിവെച്ചിട്ടുള്ള പ്രത്യേക പാര്‍ക്കിങ് ഏരിയകളില്‍ അനധികൃതമായി പാര്‍ക്ക് ചെയ്‍താല്‍ 200 ദിര്‍ഹം പിഴ ഈടാക്കുമെന്നും മുന്നറിയിപ്പ് നൽകി. ഇതിന് ശേഷം നാല് മണിക്കൂറിനകം വാഹനം ഇവിടെ നിന്ന് മാറ്റിയില്ലെങ്കില്‍ വാഹനം അധികൃതര്‍ എടുത്തുമാറ്റുകയും ചെയ്യുന്നതാണ്.

ഇതുകൂടാതെ ഔദ്യോഗിക അവധി ദിനങ്ങള്‍ അവസാനിക്കുന്നതുവരെ ദര്‍ബ് ടോള്‍ ഗേറ്റ് സംവിധാനങ്ങളിലും ചാര്‍ജ് ഈടാക്കുന്നതല്ല. അവധിക്ക് ശേഷം രാവിലെ ഏഴ് മുതല്‍ ഒന്‍പത് വരെയും വൈകുന്നേരം അഞ്ച് മുതല്‍ ഏഴ് വരെയും ടോള്‍ ഈടാക്കുന്നതാണ്. ശനിയാഴ്‍ച മുതല്‍ വ്യാഴാഴ്‍ച വരെയാണ് ടോള്‍ ഈടാക്കുന്നത്. റമദാനില്‍ ടോള്‍ ഗേറ്റുകളില്‍ പണം ഈടാക്കുന്ന സമയങ്ങളില്‍ മാറ്റം വരുത്തിയിരുന്നെങ്കിലും പെരുന്നാള്‍ അവധിക്ക് ശേഷം പഴയ സമയക്രമം അനുസരിച്ചായിരിക്കും ചാര്‍ജ് ഈടാക്കുക.

അതേസമയം, യു എ ഇയിൽ ചെറിയപെരുന്നാൾ അവധി ദിനങ്ങൾ പ്രഖ്യാപിക്കുകയുണ്ടായി. സർക്കാർ മേഖലയിലും സ്വകാര്യ സ്ഥാപനങ്ങൾക്കും റമദാൻ 29 മുതൽ ശവ്വാൽ മൂന്ന് വരെയാണ് അവധി പ്രഖ്യാപിച്ചിട്ടുള്ളത്. ഇതനുസരിച്ച് റമദാൻ 29 ന് നോമ്പ് അവസാനിച്ച് മെയ് 12 ന് പെരുന്നാൾ ആയാൽ മെയ് 11 ചൊവ്വാഴ്ച മുതൽ 14 വെള്ളിയാഴ്ച വരെ മുടക്ക് ലഭിക്കുന്നതാണ്.

മെയ് 13 നാണ് പെരുന്നാൾ എങ്കിൽ മെയ് 11 ചൊവ്വാഴ്ച മുതൽ 15 ശനിയാഴ്ച വരെ അവധി ലഭിക്കുകയും ചെയ്യും. വെള്ളി, ശനി ദിവസങ്ങൾ വാരാന്ത്യഅവധി ആയതിനാൽ ഫലത്തിൽ പലർക്കും അഞ്ച് ദിവസം വരെ അവധികിട്ടും.സ്വകാര്യമേഖലക്ക് തൊഴിൽമന്ത്രാലയവും, സർക്കാർ മേഖലക്ക് സർക്കാർ മാനവവിഭവ ശേഷി ഫെഡറൽ അതോറിറ്റിയുമാണ് അവധി പ്രഖ്യാപിച്ചത്.