ഇസ്രയേല്‍ മുന്‍ പ്രധാനമന്ത്രി ഏരിയല്‍ ഷാരോണ്‍ അന്തരിച്ചു. എണ്‍പത്തിയഞ്ച് വയസ്സായിരുന്നു. ടെല്‍ അവൈവിലെ സ്വകാര്യ ആശുപത്രിയിലായിരുന്നു അന്ത്യം.  എട്ട് വര്‍ഷമായി അദ്ദേഹം അബോധാവസ്ഥയിലായിരുന്നു.

രണ്ടു പതിറ്റാണ്ടോളം ഇസ്രായേല്‍ മന്ത്രിസഭയില്‍ അംഗമായിരുന്ന അദ്ദേഹം കരിയറില്‍ ഉടനീളം വിവാദ നായകനായാണ് അറിയപ്പെടുന്നത്. 2001 ല്‍ ഇസ്രായേലിന്റെ പ്രധാനമന്ത്രിയായ അദ്ദേഹം 2006 ജനുവരി 4 നാണ് പക്ഷാഘാതത്തിന് ഇരയായത്.

രോഗത്തെത്തുടര്‍ന്ന് ഷാരോണ്‍ സ്ഥാനമൊഴിഞ്ഞശേഷം ഗാസയുടെ നിയന്ത്രണം പലസ്തീന്‍ ഇസ്ലാമികപ്രസ്ഥാനമായ ഹമാസ് കൈയടക്കുകയും ചെയ്തു.1982ല്‍ ഇരുപതിനായിരത്തോളം പേരുടെ മരണത്തിനിടയാക്കിയ ഇസ്രായേലിന്റെ ലബനന്‍ അധിനിവേശം ഷാരോണ്‍ പ്രതിരോധമന്ത്രിയായിരുന്നപ്പോഴായിരുന്നു.

1928 ഫെബ്രുവരി 26 ന് ജനിച്ച ഷാരോണ്‍ ഇസ്രായേല്‍ സൈന്യം തുടങ്ങിയ 1948 മുതല്‍ സൈന്യത്തില്‍ കമാന്ററായിരുന്നു. ഇസ്രായേല്‍ സ്വാതന്ത്ര്യ സമരത്തിന്റെ ഭാഗമായി നിരവധി യുദ്ധങ്ങളില്‍ പങ്കെടുത്തിട്ടുണ്ട്.

വൃക്കരോഗത്തെ തുടര്‍ന്ന് കഴിഞ്ഞദിവസം അദ്ദേഹത്തെ ശസ്ത്രക്രിയയ്ക്ക് വിധേയനാക്കിയിരുന്നു. ഇതിനെ തുടര്‍ന്ന് അദ്ദേഹം മരണാസന്നനാണെന്ന വാര്‍ത്ത ഇസ്രായേല്‍ പുറത്തുവിട്ടു. ഇന്നാണ് മരണവാര്‍ത്ത ഔദ്യോഗികമായി സ്ഥിരീകരിച്ചത്.