മീന അബ്ദുല്ലയിലെ ടയര്‍ കൂമ്പാരത്തില്‍ വന്‍ തീപിടിത്തം
മീന അബ്ദുല്ലയിലെ സ്ക്രാപ്യാഡില്‍ സൂക്ഷിച്ച ടയര്‍ കൂമ്പാരത്തിലുണ്ടായ വന്‍ തീപിടിത്തം അഗ്നിശനമ വിഭാഗം നിയന്ത്രണ വിധേയമാക്കി. ഇന്നലെ പുലര്‍ച്ചെ ആറു മണിയോട് കൂടിയാണ് പ്രദേശത്ത് 600 മീറ്റര്‍ ചുറ്റളവില്‍ സ്ഥലത്ത് സൂക്ഷിച്ചിരുന്ന ആയിരക്കണക്കിന് വരുന്ന ടയര്‍ കൂമ്പാരാത്തില്‍ തീ പടര്‍ന്നത്. തീപിടിത്തത്തെ തുടര്‍ന്നുണ്ടായ പുകപടലം പ്രദേശത്ത് ഇരുട്ട് പരത്തി.
ടയറുകള്‍ കത്തിയെരിഞ്ഞുണ്ടായ പുക ആകാശം മുട്ടേ ഉയര്‍ന്നുപൊങ്ങുന്നത് ദൂരദിക്കുക്കളില്‍നിന്നുപോലും കാണാമായിരുന്നു. ഇതിനുപുറമെ ടയറുകള്‍ കത്തിയപ്പോള്‍ അടുത്ത പ്രദേശങ്ങളില്‍പോലും അതിന്‍െറ രൂക്ഷ ഗന്ധം അനുഭവപ്പെട്ടത് ജനങ്ങള്‍ക്ക് അസഹനീയമായി. തീപിടിത്തത്തോടൊപ്പം മേഖലയില്‍ പുലര്‍ച്ചെ മണിക്കൂറില്‍ 18 കിലോമീറ്റര്‍ വേഗതയില്‍ വടക്കുപടിഞ്ഞാറന്‍ കാറ്റടിച്ചുവീശുകയും ചെയ്തതോടെ വെണ്ണീരും അവശിഷ്ടങ്ങളും സമീപ പ്രദേശങ്ങളില്‍വരെ ചെന്നത്തി.
വിവരം ലഭിച്ചതിനെ തുടര്‍ന്ന് മീന അബ്ദുല്ല, ശുഐബ ഇന്‍ഡസ്ട്രിയല്‍ ഏരിയ, ഖുറൈന്‍, അസ്നാദ് തുടങ്ങിയ വിവിധ ഭാഗങ്ങളില്‍നിന്ന് ഫയര്‍ഫോഴ്സ് വിഭാഗങ്ങള്‍ സര്‍വസന്നാഹങ്ങളുമായി സംഭവ സ്ഥലത്തേക്ക് കുതിക്കുകയായിരുന്നു. വിവിധ യൂനിറ്റുകളില്‍നിന്നായി 80 അഗ്നിശമന ഉദ്യോഗസ്ഥരും കുവൈത്ത് മുനിസിപ്പാലിറ്റിയുടെ നിരവധി ജെ.സി.ബി വാഹനങ്ങളും തീ അണക്കുന്ന പ്രവര്‍ത്തികളില്‍ ഏര്‍പ്പെട്ടു. സംഭവത്തില്‍ ആളപായമുണ്ടായതായി റിപ്പോര്‍ട്ടില്ല.
https://www.facebook.com/Malayalivartha
