പൊതുമാപ്പ് പ്രയോജനപ്പെടുത്തുന്നവര്ക്ക് സൗദി ടിക്കറ്റ് വഹിക്കുമെന്ന പ്രചാരണം അടിസ്ഥാനരഹിതം
'നിയമലംഘകരില്ലാത്ത രാജ്യം' ക്യാംപെയിനിന്റെ ഭാഗമായി ഈ മാസം 29 മുതല് 90 ദിവസത്തേയ്ക്ക് പ്രഖ്യാപിച്ച പൊതുമാപ്പ് പ്രയോജനപ്പെടുത്തുന്നവര്ക്കുള്ള ടിക്കറ്റ് സൗദി വഹിക്കുമെന്ന് പ്രചാരണമുണ്ടായിരുന്നു. പൊതുമാപ്പ് പ്രയോജനപ്പെടുത്തുന്നവര്ക്ക് സൗദി ടിക്കറ്റ് വഹിക്കുമെന്ന പ്രചാരണം അടിസ്ഥാനരഹിതമാണെന്ന് ജവാസാത് വ്യക്തമാക്കി. പൊതുമാപ്പ് പ്രയോജനപ്പെടുത്തുന്നവര് സ്വന്തം ചെലവിലാണ് മടങ്ങിപ്പോകേണ്ടതെന്ന് ജവാസാത്ത് മേധാവി മേജര് ജനറല് സുലൈമാന് അല്യഹ്യ അറിയിച്ചു.
ശുമൈസിയിലെ നാടുകടത്തല് കേന്ദ്രത്തില് വിപുലമായ സജീകരണങ്ങള് ഏര്പ്പെടുത്തിയത് പൊതുമാപ്പ് പ്രയോജനപ്പെടുത്തുന്നവര്ക്ക് സൗദി അറേബ്യയുടെ ചെലവില് നാട്ടിലേക്ക് പോകുന്നതിന് ആവശ്യമായ സൗകര്യങ്ങള് ലഭ്യമാക്കാന് വേണ്ടിയാണെന്നും റിപ്പോര്ട്ടുണ്ടായിരുന്നു. ഹജ്, ഉംറ, സന്ദര്ശക വീസക്കാര് ടിക്കറ്റും പാസ്പോര്ട്ടുമായി വിമാനത്താവളങ്ങള് അടക്കമുള്ള അതിര്ത്തി പോസ്റ്റുകളില് നേരിട്ട് എത്തണമെന്ന് ജവാസാത് മേധാവി വ്യക്തമാക്കി. ഇവര്ക്ക് ഇവിടെ വെച്ച് എക്സിറ്റ് നല്കുമെന്നും ഇതിനായി പ്രത്യേകം കൗണ്ടറുകള് തന്നെ തുറക്കുമെന്നും അദ്ദേഹം പറഞ്ഞു.
കേസുകളുമായും മറ്റും ബന്ധപ്പെട്ട് സുരക്ഷാ വകുപ്പുകള് അന്വേഷിച്ചുവരുന്നവരല്ലെന്ന് വിരലടയാളവും കണ്ണടയാളവും പരിശോധിച്ച് ഉറപ്പുവരുത്തിയ ശേഷമാകും എക്സിറ്റ് നല്കുക. ഇഖാമ, തൊഴില് നിയമ ലംഘകര് ഓണ്ലൈന് വഴി നടപടിക്രമങ്ങള് പൂര്ത്തിയാക്കണം. ഇതിന് സാധ്യമാകാത്തപക്ഷം ജവാസാത് ഡയറക്ടറേറ്റുകള്ക്കു കീഴില് പ്രവര്ത്തിക്കുന്ന ഏറ്റവും അടുത്തുള്ള വിദേശി വകുപ്പുകളെ സമീപിക്കണം.
സ്പോണ്സര്മാര് ഹുറൂബാക്കിയവരും, അതിര്ത്തി വഴി രാജ്യത്ത് നുഴഞ്ഞുകയറിയവരും, അനുമതിപത്രമില്ലാതെ ഹജ് ചെയ്യാന് ശ്രമിച്ചതിനെ തുടര്ന്ന് നിയമക്കുരുക്കിലായവരും എക്സിറ്റ് നടപടികള്ക്ക് അതാത് പ്രവിശ്യകളിലെ ജവാസാത്ത് ഡയറക്ടറേറ്റുകള്ക്കു കീഴിലെ വിദേശി വകുപ്പുകള് വഴിയാണ് നടപടികള് പൂര്ത്തിയാക്കേണ്ടത്. പൊതുമാപ്പ് ആനുകൂല്യം പ്രയോജനപ്പെടുത്തി സ്വദേശങ്ങളിലേക്ക് തിരിച്ചുപോകുന്നവരെ നാടു കടത്തിയവര് എന്നോണം കരിമ്പട്ടികയില് പെടുത്തില്ല. ഇതു മൂലം എപ്പോള് വേണമെങ്കിലും പുതിയ വീസയില് സൗദിയില് വീണ്ടും വരുന്നതിന് ഒരു തടസ്സവും ഉണ്ടാവുകയില്ല.
https://www.facebook.com/Malayalivartha
