തീപിടിത്തമുണ്ടാകാനുള്ള സാഹചര്യങ്ങൾ ഒഴിവാക്കുക; ഖത്തർ നിവാസികൾക്ക് മുന്നറിയിപ്പുമായി സിവില് ഡിഫന്സ്
ഖത്തര്: ഖത്തറില് താമസിക്കുന്നവര്ക്ക് മുന്നറിയിപ്പുമായി സിവില് ഡിഫന്സ് രംഗത്തെത്തിയിരിക്കുകയാണ്. തുടർച്ചയായി തീപിടിത്തം ഉണ്ടാകുന്നതിന്റെ പശ്ചാത്തലത്തിലാണ് സിവില് ഡിഫന്സ് നിര്ദേശങ്ങളുമായി രംഗത്തെത്തിയിരിക്കുന്നത്. ഗ്യാസ് സിലിണ്ടറുകള് അലക്ഷ്യമായി ഉപയോഗിക്കരുതെന്നും വീടോ, ഓഫിസോ അടച്ചു പോകുമ്പോൾ ഗ്യാസ് സിലിണ്ടര്, ഇലക്ട്രിക്കല് ഉപകരണങ്ങള് ഓഫ് ചെയ്തു എന്നും വാതിലുകളും ജനലുകളും അടച്ചെന്ന് ഉറപ്പുവരുത്തുകയും ചെയ്യണമെന്നും നിര്ദേശത്തില് പറയുന്നു.
തീപിടിത്തമൊഴിവാക്കാന് ഗ്യാസ് സിലിണ്ടറുകള്, ഇലക്ട്രിക്കല് വയറുകള്, എയര് കണ്ടീഷനറുകള് എന്നിവ ആവശ്യമുള്ളപ്പോള് അറ്റകുറ്റപ്പണികള് നടത്തണം. വേനല്ക്കാലത്ത് ചുമരില് വിള്ളല് വീഴാതിരിക്കാന് വീടിനുള്ളില് വായുസഞ്ചാരം ഉറപ്പുവരുത്തണം.
ഗ്യാസ് ചോര്ച്ച ഉള്ളതായി സംശയം തോന്നിയാല് വാതിലുകളും ജനലുകളും തുറന്നിടണം. സിലിണ്ടറിനു മുകളില് സോപ്പ് പത തേച്ചാല് ചോര്ച്ച എവിടെ നിന്നാണെന്ന് കണ്ടെത്താന് കഴിയും. ഗ്യാസ് ചോര്ന്നാല് വൈദ്യുതി ഉപകരണങ്ങളോ സ്വിച്ചുകളോ പ്രവര്ത്തിപ്പിക്കരുത്. എളുപ്പം തീപിടിക്കുന്ന തരത്തിലുള്ള വസ്ത്രങ്ങള് അടുക്കളയില് ഉപയോഗിക്കരുത്. എക്സ്ഹോസ്റ്റ് ഫാനുകള് വൃത്തിയായി സൂക്ഷിക്കണമെന്നും തീകെടുത്താന് സഹായിക്കുന്ന ഉപകരണങ്ങള് അടുക്കളയില് സൂക്ഷിക്കണമെന്നും നിര്ദേശത്തില് പറയുന്നു.
https://www.facebook.com/Malayalivartha