ജീവിതത്തിലെ ഏകാന്തത അകറ്റാന്‍ തെരുവുപൂച്ചകള്‍ക്ക് ഭക്ഷണം കൊടുത്തുകൊണ്ടിരുന്നതിന് വൃദ്ധയ്ക്ക് ജയില്‍ശിക്ഷ. അമേരിക്കയിലെ ഒഹായോയിലെ ഒരു മജിസ്ട്രേറ്റ് കോടതിയാണ് 79-കാരിയായ നാന്‍സി സെഗുലയെ തടവിന് ശിക്ഷിച്ചത്.

തെരുവുപൂച്ചകളെ നിയമവിരുദ്ധമായി വളര്‍ത്തിയെന്ന കുറ്റം ചുമത്തിയാണ് ഗര്‍ഫീല്‍ഡ് ഹൈറ്റ്സ് മുനിസിപ്പല്‍ കോടതി മജിസ്ട്രേറ്റ് ജെഫ്രി ഷോര്‍ട് നാന്‍സിയെ 10 ദിവസം തടവിനു ശിക്ഷിച്ചത്. ശിക്ഷ അനുഭവിക്കുന്നതിനായി ഓഗസ്റ്റ് 11-ന് നാന്‍സി കുയഹോഗ കൗണ്ടി ജയിലില്‍ ഹാജരാകണം.

2017ല്‍ ഭര്‍ത്താവ് മരിച്ചതോടെ ജീവിതത്തില്‍ ഒറ്റപ്പെട്ട അവസ്ഥയിലായിരുന്നു നാന്‍സി. ഈ സമയത്താണ് അയല്‍ക്കാര്‍ താമസം മാറിയതോടെ ഉപേക്ഷിക്കപ്പെട്ട രണ്ട് പൂച്ചകള്‍ വിശന്ന് വലഞ്ഞ് നാന്‍സിയുടെ വീട്ടിലെത്തിയത്. അവര്‍ ആ പൂച്ചകള്‍ക്ക് ഭക്ഷണം നല്‍കി. പൂച്ചകള്‍ അവരുമായി ചങ്ങാത്തവുമായി.

പൂച്ചകള്‍ നാന്‍സിയുടെ വീട്ടില്‍ പെറ്റുപെരുകി. നിലവില്‍ പ്രായപൂര്‍ത്തിയായ എട്ടു പൂച്ചകളാണുള്ളത്. ഇവയില്‍ പലതും ഗര്‍ഭിണികളുമാണ്. 'എന്റെ പൂച്ചകുട്ടികളെ എനിക്ക് നഷ്ടപ്പെടുന്നു... അവ ചത്തുപോകും.. എന്റെ ഭര്‍ത്താവ് മരണമടഞ്ഞു. ഞാനിപ്പോള്‍ ഏകയാണ്. എന്നെ സഹായിക്കാന്‍ ഈ പൂച്ചകളും പൂച്ചക്കുട്ടികളും മാത്രമേയുള്ളൂ- ശിക്ഷ കേട്ട് നാന്‍സി പ്രതികരിച്ചു. പൂച്ചകളെ വളര്‍ത്തുന്നത് നിരോധിച്ച് നഗരത്തില്‍ നേരത്തെ നിയമം കൊണ്ടുവന്നിരുന്നു.

ഇതറിയാതെ പൂച്ചകളെ പരിപാലിച്ചതിന് ഇവര്‍ക്ക് നേരത്തെ 2,000 ഡോളര്‍ പിഴ ചുമത്തിയിരുന്നു. അതേസമയം, പൂച്ചകള്‍ക്ക് ഭക്ഷണം കൊടുത്തതിന് അമ്മയെ ശിക്ഷിച്ചുവെന്ന വിവരം തനിക്ക് ആദ്യം വിശ്വസിക്കാന്‍ കഴിഞ്ഞില്ലെന്ന് നാന്‍സിയുടെ മകന്‍ ദവെ പൗലോസ്‌കി പറഞ്ഞു.