ബ്രിട്ടീഷ് വിദ്യാര്ത്ഥിനി വിമാനത്തില് നിന്നു വീണ് മരിച്ചു!
കേംബ്രിഡ്ജ് സര്വകലാശാലയിലെ വിദ്യാര്ത്ഥിനി വിമാനത്തില് നിന്ന് വീണു മരിച്ചു. കേംബ്രിഡ്ജ് സര്വകലാശാലയ്ക്ക് കീഴിലുള്ള റോബിന്സന് കോളജിലെ രണ്ടാം വര്ഷ ബയോളജിക്കല് നാച്ചുറല് സയന്സ് വിദ്യാര്ത്ഥിയായിരുന്നു അലാന. ബ്രിട്ടണിലെ മില്ട്ടന് കീന്സില് നിന്നുള്ള ഈ 19-കാരി മഡഗാസ്കറില് വച്ചാണ് വിമാനത്തില് നിന്ന് വീണത്.
അപൂര്വ ഇനം ഞണ്ടുകളെ കുറിച്ച് പഠിക്കാനാണ് അലാന മഡഗാസ്കറിലേയ്ക്ക് പോയത്. വടക്കുകിഴക്കന് ഗ്രാമപ്രദേശമായ അഞ്ജവിയിലെ പുല്മൈതാനത്തിന് മുകളില് വച്ച് സെസ്ന ശൈലിയിലുള്ള ലൈറ്റ് വിമാനത്തില് നിന്നും വീണായിരുന്നു മരണം.
അതേസമയം, ഉദ്ദേശിച്ച തരത്തില് ഗവേഷണം നടത്താന് കഴിയാതെ വന്നതിനെ തുടര്ന്ന് വിദ്യാര്ത്ഥിനി വിമാനത്തില് നിന്നും ചാടി ജീവനൊടുക്കിയതാണെന്നും സ്ഥിരീകരിക്കാത്ത റിപ്പോര്ട്ടുകളുണ്ട്. പ്രസ്തുത രംഗം പുനരവതരിപ്പിച്ചപ്പോള്, അലനയുടെ സഹയാത്രികയായിരുന്ന ബ്രിട്ടീഷ് ടൂറിസ്റ്റ് രൂത്ത് ജോണ്സണ് വാതില് തുറന്ന് ചാടാനൊരുങ്ങിയ അലനയുടെ കാലില് പിടിച്ചുവലിച്ച് ചാടുന്നത് തടയാന് ശ്രമിച്ചതെങ്ങനെയെന്ന് കാണിച്ചിരുന്നു. തന്മൂലം അലന വിമാനത്തില് നിന്നു വീണതാണെന്ന വാദം അധികൃതര് മുഖവിലയ്ക്കെടുത്തിട്ടില്ല.
മികച്ച അറിവുകളും അനുഭവങ്ങളും നേടാന് എത്ര സാഹസികതയ്ക്കും തയ്യാറായിരുന്നു അലാനയെന്നും പ്രകൃതിശാസ്ത്ര പഠനത്തില് അതീവ തത്പരയായിരുന്ന അലാന മഡഗാസ്കറിലേയ്ക്ക് ഇന്റേണ്ഷിപ്പ് ആവശ്യത്തിന് പോകാന് കഴിഞ്ഞതില് വളരെ ആവേശത്തിലായിരുന്നുവെന്നും കുടുംബാംഗങ്ങള് പുറപ്പെടുവിച്ച പ്രസ്താവനയില് പറയുന്നു.
https://www.facebook.com/Malayalivartha
