ലിഫ്റ്റിനുള്ളില് വച്ച് കയര് കഴുത്തില് കുരുങ്ങി തൂങ്ങിക്കിടന്നു കുഞ്ഞനിയന്; രക്ഷപ്പെടുത്തിയ സഹോദരിയുടെ ധീരതയ്ക്കും ശാന്തതയ്ക്കും അഭിനന്ദന പ്രവാഹം
തുര്ക്കിയിലെ ഇസ്താംബുളില്, ഒരു 5 വയസ്സുകാരന്റെ കൈയ്യിലുണ്ടായിരുന്ന കയര് ലിഫ്റ്റിനകത്ത് വച്ച് അവന്റെ കഴുത്തില് കുടുങ്ങി. സഹോദരി ബുദ്ധിപൂര്വം ഇടപെട്ടതാണ് കുട്ടിക്ക് രക്ഷയായത്. ലിഫ്റ്റ് താഴ്ന്നപ്പോള് കുട്ടിയുടെ കയ്യിലുണ്ടായിരുന്ന കയര് കുടുങ്ങിയാണ് അപകടമുണ്ടായത്.
സഹോദരനും സഹോദരിയും മറ്റൊരു കുട്ടിയോടൊപ്പം കളിക്കാന് പോകാനാണ് ലിഫ്റ്റില് കയറിയത്. കളിക്കാന് ഉപയോഗിക്കുന്ന കയര് ആണ്കുട്ടിയുടെ കയ്യില് ഉണ്ടായിരുന്നു. എന്നാല് ലിഫ്റ്റിന്റെ വാതില് അടഞ്ഞപ്പോള് കയറിന്റെ പകുതി ഭാഗം പുറത്തായി. ലിഫ്റ്റ് താഴാന് തുടങ്ങിയതോടെ കയര് കഴുത്തില് കുടുങ്ങി. ഇതോടെ കുട്ടി മുകളിലേക്ക് ഉയര്ന്ന് ശ്വാസത്തിനു വേണ്ടി പിടഞ്ഞു. ഇതു കണ്ട പെണ്കുട്ടി അപായമണി മുഴക്കി ലിഫ്റ്റ് നിര്ത്തി. ഇതിനുശേഷം സഹോദരന്റെ കഴുത്ത് കയറില് നിന്നു മാറ്റി താഴെയിറക്കി. കഴുത്തിനു പരുക്കേറ്റെങ്കിലും കുട്ടി രക്ഷപ്പെട്ടു എന്നാണ് റിപ്പോര്ട്ടുകള്.
പെണ്കുട്ടിയുടെ അസാമാന്യ ധൈര്യവും അതിവേഗത്തിലുള്ള രക്ഷാപ്രവര്ത്തനവും ലിഫ്റ്റിനുള്ളിലെ സിസിടിവി ക്യാമറയില് പതിഞ്ഞിരുന്നു. ഈ ദൃശ്യങ്ങള് സോഷ്യല് ലോകത്ത് വൈറലാണ്. വിവിധഭാഗങ്ങളില് നിന്ന് പെണ്കുട്ടിയെ തേടി അഭിനന്ദനങ്ങള് എത്തുന്നുണ്ട്. ഇത്രയും ധീരതയും പക്വതയുമുള്ള പെണ്കുട്ടിയെ അടുത്തൊന്നും കണ്ടിട്ടില്ല എന്നാണ് സോഷ്യല് ലോകം പറയുന്നത്.
https://www.facebook.com/Malayalivartha