വിമാനത്തിനുള്ളില് പുക; പരിഭ്രാന്തരായി യാത്രക്കാര്; അടിയന്തര ലാന്ഡിങ്
വിമാനത്തിനുള്ളില് പുക ഉയര്ന്നതിനെ തുടര്ന്ന് ബ്രിട്ടീഷ് എയര്വേസ് യാത്രക്കാരെ ഒഴിപ്പിച്ചു. ലണ്ടനില് നിന്ന് സ്പെയിനിലേക്ക് പോകുകയായിരുന്ന വിമാനത്തില് നിന്നാണ് പുക ഉയര്ന്നതിനെ തുടര്ന്ന് ആളുകളെ ഒഴിപ്പിച്ചത്. വിമാനം സ്പെയിനിലെ വാലന്സിയയില് ഇറങ്ങാന് മിനുട്ടുകള് മാത്രം ബാക്കി നില്ക്കെയാണ് കാബിനില് കട്ടിയുള്ള വെളുത്ത പുക പടര്ന്നത്.
വിമാനത്തില് പുക നിറയുന്നതിന്റെ വീഡിയോയും ഫോട്ടോകളും ഇന്റര്നെറ്റില് പ്രചരിക്കുന്നുണ്ട്. രണ്ട് സീറ്റ് അപ്പുറത്തുള്ള യാത്രക്കാരെപ്പോലും കാണാനാകാത്ത വിധം പുക ഉയര്ന്നിരുന്നുവെന്ന് യാത്രക്കാരിലൊരാളായ റേച്ചല് ജപ്പ് പറഞ്ഞതായി ബിബിസി റിപ്പോര്ട്ട് ചെയ്യുന്നു. മറ്റൊരു യാത്രികയായ ലൂസി ബ്രൗണ് പറഞ്ഞത് ഭീതിപ്പെടുത്തുന്ന സിനിമപോലെയായിരുന്നു ആ അനുഭവമെന്നാണ്.
ഹീത്രുവില് നിന്ന് വലന്സിയയിലേക്ക് പോവുകയായിരുന്ന ബ്രിട്ടീഷ് എയര്വേയ്സ് വിമാനത്തിലായിരുന്നു സംഭവം. വിമാനത്തില് പുകയുയര്ന്നതിനെ തുടര്ന്ന് വിമാനം വലന്സിയ വിമാനത്താവളത്തില് അടിയന്തരമായി നിലത്തിറക്കി. 175 യാത്രക്കാരും എട്ടുജീവനക്കാരും ഉള്പ്പെടെ 183 പേരാണ് വിമാനത്തിലുണ്ടായിരുന്നത്. ഇവരെ സുരക്ഷിതമായി പുറത്തെത്തിച്ചെന്നും സാങ്കേതിക തകരാറാണ് പുകയുയരാന് കാരണമെന്നും ബ്രീട്ടിഷ് എയര്വേയ്സ് അറിയിച്ചു.
ബ്രിട്ടീഷ് എയര്വേയ്സിന്റെ ബിഎ422 വിമാനം വലന്സിയയില് ലാന്ഡ് ചെയ്യുന്നതിന് മുന്പാണ് വിമാനത്തിനുള്ളില് പുക നിറഞ്ഞത്. പുക ഉയരുന്നതു കണ്ട് പരിഭ്രാന്തരായ യാത്രക്കാര് ഇതോടെ ഭയന്നുനിലവിളിക്കുകയായിരുന്നു. ശാരീരികാസ്വാസ്ഥ്യം അനുഭവപ്പെട്ട മൂന്നുയാത്രക്കാരെ ആശുപത്രിയില് പ്രവേശിപ്പിച്ച് പ്രാഥമിക ചികിത്സ നല്കി വിട്ടയച്ചു
https://www.facebook.com/Malayalivartha