അത്യാധുനിക മിസൈല് പ്രതിരോധ സംവിധാനം പുറത്തിറക്കി അമേരിക്ക നൽകിയ മുന്നറിയിപ്പിന് പുല്ലുവില കൽപ്പിച്ച് ഇറാൻ
കഴിഞ്ഞ ദിവസം നടന്ന ചടങ്ങില് ഇറാന പ്രസിഡന്റ് ഹസന് റൂഹാനിയാണ് ബാവര് 373 എന്ന് പേരിട്ടിരിക്കുന്ന മിസൈല് പ്രതിരോധ സംവിധാനം ഔദ്യോഗികമായി ഉദ്ഘാടനം ചെയ്തത്. റഷ്യന് നിര്മിത എസ് 300 മിസൈലുകളേക്കാള് കാര്യക്ഷമയുള്ളതാണ് ബാവര് 373 എന്നാണ് ഇറാന്റെ അവകാശവാദം. 300 കിലോമീറ്റര് പ്രഹരശേഷിയുള്ള മിസൈല് 65 കിലോമീറ്റര് ഉയരത്തില് പറക്കുന്ന മിസൈലിനെപ്പോലും പ്രതിരോധിക്കുമെന്നും ഇറാന് മാദ്ധ്യമങ്ങള് അവകാശപ്പെടുന്നു.
അതേസമയം, അമേരിക്കയുമായുള്ള തര്ക്കം തുടരുന്നതിനിടയില് ഇറാൻ മിസൈല് പ്രതിരോധ സംവിധാനം വികസിപ്പിച്ചത് മേഖലയില് കൂടുതല് സംഘര്ഷത്തിന് കാരണമാകുമോയെന്നാണ് എല്ലാവരും ഉറ്റുനോക്കുന്നത്. നേരത്തെ ഇറാന് തദ്ദേശീയമായി വികസിപ്പിച്ച മിസൈല് ഉപയോഗിച്ച് അമേരിക്കയുടെ അത്യാധുനിക ആര്ക്യൂ 4 ഗ്ലോബര് ഹോക്ക് നിരീക്ഷണ വിമാനത്തെ വെടിവച്ചിട്ടിരുന്നു. തങ്ങളുടെ വ്യോമപരിധി ലംഘിച്ചുവെന്ന് ആരോപിച്ചായിരുന്നു ഇറാന്റെ പ്രകോപനം.
2016ല് ബാവര് മിസൈല് പ്രതിരോധ സംവിധാനത്തിന്റെ ആദ്യ ചിത്രങ്ങള് ഇറാന് പുറത്തുവിട്ടു. പിന്നാലെ 2018 ജനുവരിയില് മിസൈല് പരീക്ഷിക്കുന്നതിന്റെ ചിത്രങ്ങളും ഇറാന് പുറത്തുവിട്ടു. മെറാജ് 4 ഫയര് കണ്ട്രോള് റഡാര് സ്ഥാപിച്ചിട്ടുള്ള മിസൈല് പ്രതിരോധ സംവിധാനത്തിന് ഒരേസമയം നൂറോളം ടാര്ഗറ്റുകളെ കണ്ടെത്താനും അവയില് 60 എണ്ണത്തിനെ പിന്തുടര്ന്ന് ഒരേസമയം ആറെണ്ണത്തിനെ വരെ തകര്ക്കാനും കഴിയും.
വ്യത്യസ്ത ഉയരത്തില് പറക്കുന്ന മിസൈലുകളെ കണ്ടെത്താന് ഒരേസമയം മൂന്ന് മിസൈലുകള് വരെ അയയ്ക്കാന് ബാവറിന് കഴിയും. ബാലിസ്റ്റിക്, ക്രൂസ് മിസൈലുകളും വിമാനങ്ങളെയും ഡ്രോണുകളെയും കണ്ടെത്തി തകര്ക്കാന് ബാവറിന് കഴിയുമെന്ന് നേരത്തെ തന്നെ ഇറാന് അവകാശപ്പെട്ടിരുന്നു. എസ് 300ന്റെ ഇറാനിയന് വേര്ഷന് നിര്മിക്കാനല്ല തങ്ങള് ശ്രമിച്ചതെന്നും രാജ്യത്തിന് വേണ്ടി സ്വന്തമായി ഒരു മിസൈല് പ്രതിരോധ സംവിധാനം നിര്മിക്കുകയായിരുന്നു ലക്ഷ്യമെന്നും ഇറാന് വ്യക്തമാക്കുന്നു.
2007ല് റഷ്യന് മിസൈല് പ്രതിരോധ സംവിധാനമായ എസ് 300 വാങ്ങാന് ഇരുരാജ്യങ്ങളും തമ്മില് ഒപ്പുവച്ചിരുന്നു. എന്നാല് അന്താരാഷ്ട്ര സമ്മര്ദ്ദത്തെ തുടര്ന്ന് 2010ല് റഷ്യ ഈ കരാറില് നിന്നും പിന്മാറി. തുടര്ന്നാണ് തദ്ദേശീയമായി മിസൈല് പ്രതിരോധ സംവിധാനം ഒരുക്കാന് ഇറാന് തീരുമാനിച്ചത്.
https://www.facebook.com/Malayalivartha