ലോകമെമ്പാടും അഭയാര്‍ഥി ക്ഷേമത്തിനായി നടത്തിയ നിരന്തര ശ്രമങ്ങളുടെ പേരില്‍ ആദരിക്കപ്പെട്ട, ഐക്യരാഷ്ട്ര സംഘടന അഭയാര്‍ഥി വിഭാഗത്തിന്റെ (യുഎന്‍എച്ച്സിആര്‍) ആദ്യ വനിതാമേധാവിയായ സഡാക്കോ ഒഗാത (92) അന്തരിച്ചു.

യുഎന്‍എച്ച്സിആര്‍ മേധാവിയായിരുന്ന കാലത്ത് (1991-2000) റുവാണ്ട, സുഡാന്‍, മുന്‍ യുഗോസ്ലാവ്യ അടക്കം സംഘര്‍ഷ മേഖലകള്‍ സന്ദര്‍ശിച്ച് അഭയാര്‍ഥി പ്രതിസന്ധിക്കു പരിഹാരം തേടി. ഗള്‍ഫ് യുദ്ധാനന്തരം ഇറാഖില്‍ നിന്നു പലായനം ചെയ്ത കുര്‍ദുകള്‍ക്കായി സഹായ പദ്ധതി നടപ്പിലാക്കി.

യുഎന്നിലേക്കുള്ള ജപ്പാന്റെ ആദ്യ വനിതാ പ്രതിനിധിയായാണ് 1976-ല്‍ രാജ്യാന്തര രംഗത്തേക്ക് ഒഗാതയുടെ വരവ്. യുഎന്നില്‍ നിന്നു തിരിച്ചെത്തിയ ശേഷം ജപ്പാന്റെ ഇന്റര്‍നാഷനല്‍ കോ ഓപ്പറേഷന്‍ ഏജന്‍സിയുടെ മേധാവിയായിരുന്നു.