നവജാതശിശുക്കള്‍ക്ക് മുലപ്പാലില്‍ മോര്‍ഫിന്‍ കലര്‍ത്തി നല്‍കി കൊല്ലാന്‍ ശ്രമിച്ച നഴ്‌സ് പിടിയില്‍
ജര്‍മനിയിലെ ഉയിം സര്‍വകലാശാല ആശുപത്രിയില്‍ നവജാതശിശുക്കളെ മോര്‍ഫിന്‍ നല്‍കി കൊലപ്പെടുത്താന്‍ ശ്രമിച്ച നഴ്‌സ് പിടിയിലായി. 2019 ഡിസംബര്‍ 20-നാണ് കേസിനാസ്പദമായ സംഭവം നടന്നത്.
ആശുപത്രിയില്‍ ഉണ്ടായിരുന്ന ഒരു ദിവസം മുതല്‍ ഒരു മാസം വരെ പ്രായമുള്ള അഞ്ച് നവജാതശിശുക്കളെ ഒരേസമയം മുലപ്പാലില്‍ മോര്‍ഫിന്‍ കലര്‍ത്തി കൊലപ്പെടുത്താനാണ് നഴ്‌സ് ശ്രമിച്ചത്.
എന്നാല്‍, കുട്ടികള്‍ക്ക് ശ്വാസതടസ്സം നേരിട്ടത് ഡ്യൂട്ടിയിലുണ്ടായിരുന്ന മറ്റ് നഴ്‌സുമാരുടെ ശ്രദ്ധയില്‍പ്പെട്ടിരുന്നു. ഉടന്‍ തന്നെ അടിയന്തര ചികിത്സ നല്‍കിയതുകൊണ്ട് അഞ്ച് കുരുന്നുകളുടേയും ജീവന്‍ രക്ഷിക്കാനായി.
കുഞ്ഞുങ്ങള്‍ക്ക് ഏതെങ്കിലും ഇന്‍ഫക്ഷന്‍ ബാധിച്ചെന്നായിരുന്നു ഡോക്ടറുമാരുടെ ആദ്യനിഗമനം.
എന്നാല്‍ കുഞ്ഞുങ്ങളുടെ മൂത്രത്തില്‍ മോര്‍ഫിന്റെ അളവ് കണ്ടെത്തിയത് സംശയത്തിന് ആക്കം കൂട്ടി. തുടര്‍ന്ന് നടന്ന പൊലീസ് അന്വേഷണത്തില്‍ നഴ്‌സ് കുടുങ്ങുകയായിരുന്നു.
അറസ്റ്റിലായ നഴ്സിന്റെ ലോക്കറില്‍നിന്ന് മോര്‍ഫിന്‍ കലര്‍ത്തിയ മുലപ്പാലും സിറിഞ്ചും കണ്ടെടുത്തെന്ന് പൊലീസ് അറിയിച്ചു.
https://www.facebook.com/Malayalivartha
