ലോകത്ത് കോവിഡ് 19 ബാധിച്ച് മരിച്ചവരുടെ എണ്ണം 21,200 ആയി. 468,905 പേര്‍ക്കാണ് ഇതുവരെ രോഗം സ്ഥിരീകരിച്ചത്. ഇതില്‍ 114,218 പേര്‍ രോഗമുക്തരായി. കോവിഡ് ഏറ്റവും നാശം വിതച്ച ഇറ്റലിയില്‍ മരണസംഖ്യ 7503 ആയി. 24 മണിക്കൂറിനിടെ 683 പേരാണ് ഇവിടെ മരിച്ചത്. സ്‌പെയിനില്‍ 656 പേരും ഫ്രാന്‍സില്‍ 231 പേരും യു.എസില്‍ 164 പേരും ഇറാനില്‍ 143 പേരുമാണ് 24 മണിക്കൂറിനിടെ മരണപ്പെട്ടു. 1063 രോഗബാധിതരുള്ള പാകിസ്താനില്‍ ഒരാള്‍ മരിച്ചു. 91 പേര്‍ക്കാണ് പുതുതായി രോഗം കണ്ടെത്തിയത്.
ഇസ്രയേലില്‍ ഇന്നലെ മാത്രം 439 പേര്‍ക്ക് രോഗം സ്ഥിരീകരിച്ചതോടെ ആകെ രോഗികളുടെ എണ്ണം 2369 ആയി. അഞ്ചുപേരാണ് ഇതുവരെ മരണപ്പെട്ടത്. അതേസമയം, കോവിഡിന്റെ പ്രഭവകേന്ദ്രമായ ചൈനയില്‍നിന്ന് ആശ്വാസവാര്‍ത്തകളാണ് പുറത്തുവരുന്നത്. രോഗത്തെ വരുതിയിലേക്ക് കൊണ്ടുവരുന്ന ഇവിടെ ആറുപേര്‍ മാത്രമാണ് ഇന്നലെ മരിച്ചത്. 67 പുതിയ കേസുകള്‍ സ്ഥിരീകരിച്ചു. ഇറ്റലിയിലും സ്‌പെയിനിലും യു.എസിലും കൂടി 23,000ല്‍ ഏറെ പേര്‍ക്ക് ഇന്നലെ കോവിഡ് സ്ഥിരീകരിച്ചു. 24 മണിക്കൂറിനിടെ ലോകത്താകമാനം 46,333 കേസാണ് സ്ഥിരീകരിച്ചത്.