സൗത്ത് കൊറിയയില്‍ 97 വയസുകാരി അമ്മൂമ്മയാണ് രണ്ടാഴ്ചത്തെ ചികിത്സയിലൂടെ ജീവിതത്തിലേക്ക് തിരികെ വന്നത്. സൗത്ത് കൊറിയയില്‍ ഇതു വരെ രോഗത്തെ അതിജീവിച്ച ഏറ്റവും പ്രായമേറിയ വ്യക്തിയും ഈ 97 വയസുകാരി അമ്മൂമ്മ തന്നെയാണ്. മാര്‍ച്ച് 13 മുതല്‍ പോഹാങ് മെഡിക്കല്‍ സെന്ററില്‍ ചികിത്സയിലായിരുന്നു ഇവര്‍. ആശുപത്രി വിട്ടതിന് ശേഷം വീണ്ടും രോഗം വരാതിരിക്കാന്‍ വീട്ടില്‍ ഐസൊലേഷനില്‍ കഴിയുകയാണിവരെന്നു കൊറിയന്‍ ടൈംസ് റിപ്പോര്‍ട്ട് ചെയ്യുന്നു.

കൊറോണ രോഗത്തില്‍ നിന്നും മുക്തി നേടിയ ഇറ്റലിയിലെ ഏറ്റവും പ്രായമേറിയ വ്യക്തിയാണ് 95 വയസുകാരി അല്‍മ ക്ലാര കോര്‍സിനി. മാര്‍ച്ച് അഞ്ചിന് മൊഡെനയ്ക്ക് സമീപമുള്ള ആശുപത്രിയില്‍ പ്രവേശിക്കപ്പെട്ട അല്‍മ ഇപ്പോള്‍ ആരോഗ്യവതിയായി വീട്ടില്‍ തിരിച്ചെത്തി. 'എനിക്ക് സുഖമാണ്, എനിക്ക് തീര്‍ത്തും സുഖമാണ്',ആല്‍മ പറയുന്നു. കൂടാതെ, തന്നെ ചികില്‍സിച്ച ഡോക്ടര്‍മാരെയും നഴ്‌സുമാരെയും ഹൃദയാപ്പൂര്‍വം അഭിനന്ദിക്കുകയും ചെയ്തു.
ചൈനയില്‍ നൂറു വയസുള്ള വ്യക്തിക്ക് രോഗം ഭേദമായതായി മാര്‍ച്ച് ആദ്യ വാരം തന്നെ വാര്‍ത്തകള്‍ പുറത്തു വന്നിരുന്നു. ഫെബ്രുവരി 24 നാണ് കൊറോണ രോഗ ലക്ഷണങ്ങളോടെ ഹുബെ പ്രവിശ്യയിലെ ആശുപത്രിയില്‍ വയോധികനെ പ്രവേശിപ്പിച്ചത്. അല്‍ഷിമേഴ്‌സും ഹൃദയ സംബന്ധമായ അസുഖവും മറ്റു ആരോഗ്യ പ്രശ്‌നങ്ങളും വയോധികനുണ്ടായിരുന്നു. എന്നാല്‍ ഇതിനെയെല്ലാം അതിജീവിച്ചു നൂറു വയസുകാരന്‍ ആശുപത്രിയില്‍ നിന്നും തിരികെ വീട്ടിലെത്തി.