ജൂണില്‍ നടക്കാനിരിക്കുന്ന ജി 7 ഉച്ചകോടി മാറ്റിവെക്കുമെന്ന് യുഎസ് പ്രസിഡന്‍റ് ഡോണള്‍ഡ് ട്രംപ്. കാലഹരണപ്പെട്ട കൂട്ടായ്‍മയാണ് ജി 7 എന്നും കൂടുതല്‍ രാജ്യങ്ങളെ ഉള്‍പ്പെടുത്തി വിപുലമാക്കണമെന്നും ട്രംപ് പറഞ്ഞു. യു എസ്‌, ഇറ്റലി, കാനഡ, ഫ്രാൻസ്, ജർമ്മനി, യു കെ, യൂറോപ്യൻ യൂണിയൻ തുടങ്ങിയ രാജ്യങ്ങൾ അടങ്ങുന്നതാണ് ജി -7.

ഇന്ത്യ, റഷ്യ, ഓസ്ട്രേലിയ, ദക്ഷിണ കൊറിയ എന്നീ രാജ്യങ്ങളെ കൂടി ഉച്ചകോടിക്ക് ക്ഷണിക്കുമെന്ന് ട്രംപ് വ്യക്തമാക്കി. ലോകത്തിന്‍റെ യഥാര്‍ഥ പ്രതിനിധികള്‍ ജി 7 ഉച്ചകോടിയില്‍ ഉണ്ടെന്ന് തോന്നിയിട്ടില്ല. അതിനാലാണ് കൂടുതല്‍ രാജ്യങ്ങളെ പങ്കെടുപ്പിക്കാന്‍ തീരുമാനിക്കുന്നതെന്നും അദ്ദേഹം പറഞ്ഞു.

ജൂണ്‍ അവസാന വാരം വീഡിയോ കോണ്‍ഫറന്‍സിലൂടെ ഉച്ചകോടി നടത്താനായിരുന്നു നേരത്തേ തീരുമാനിച്ചിരുന്നത്. എന്നാല്‍ കൊവിഡ്-19 പ്രതിസന്ധിയുടെ പശ്ചാത്തലത്തില്‍ ഉച്ചകോടി നടത്താനാകില്ലെന്ന നിലപാടിലേക്ക് ട്രംപ് എത്തുകയായിരുന്നു. യുഎന്‍ ജനറല്‍ അംസംബ്ലി ചേരുന്നതിന് മുമ്പായി സെപ്റ്റംബറില്‍ ഉച്ചകോടി നടത്താനാകുമെന്നാണ് പ്രതീക്ഷിക്കുന്നതെന്ന് ട്രംപ് പറഞ്ഞു.

അമേരിക്ക, ബ്രിട്ടന്‍, കാനഡ, ജര്‍മനി, ഇറ്റലി, ഫ്രാന്‍സ്, ജപ്പാന്‍ എന്നീ രാജ്യങ്ങളുടെ കൂട്ടായ്‍മയാണ് ജി 7. ഉച്ചകോടിയിലേക്കുള്ള ക്ഷണം നേരത്തെ ജര്‍മന്‍ ചാന്‍സലര്‍ ആഞ്ചല മെര്‍ക്കല്‍ നിഷേധിച്ചിരുന്നു.