രാജ്യത്തെ പ്രധാന നഗരമായ ഗോമക്കു സമീപമാണ് പൊട്ടിത്തെറി ഉണ്ടായത്. ശനിയാഴ്ച രാത്രിയോടെ ആരംഭിച്ച സ്‌ഫോടനത്തെ തുടര്‍ന്ന് ആയിരക്കണക്കിന് നാട്ടുകാര്‍ അതിര്‍ത്തി കടന്നതായി അയല്‍ രാജ്യമായ റുവാന്‍ഡ അറിയിച്ചു.

രാത്രിയിലായതിനാല്‍ കുഞ്ഞുങ്ങളെ കൂട്ടി കിട്ടിയതുമായി കുടുംബങ്ങള്‍ കൂട്ട പലായനം തുടരുകയാണ്. ഇവരെ സ്‌കൂളുകളിലും ആരാധനാലയങ്ങളിലും പാര്‍പ്പിച്ചുവരികയാണ്.

അഗ്‌നിപര്‍വതത്തില്‍ പുതിയ വിള്ളലുകള്‍ പ്രത്യക്ഷപ്പെടുന്നത് വലിയ പൊട്ടിത്തെറിയുടെ തുടക്കമാകുമോ എന്നാണ് അധികൃതര്‍ ഭയക്കുന്നത്. നയിരഗോംഗോ അഗ്‌നിപര്‍വതത്തില്‍നിന്ന് ഗോമ പട്ടണത്തിലേക്ക് ശക്തമായ ലാവ പ്രവാഹം തുടരുന്നത് ആശങ്കയോടെയാണ് രാജ്യം കാണുന്നത്.

ലോകത്ത് ഇപ്പോഴും സജീവമായ വലിയ അഗ്‌നിപര്‍വതങ്ങളിലൊന്നാണ് നയിരഗോംഗോ.അടിയന്തര സാഹചര്യം വിലയിരുത്താന്‍ പ്രധാനമന്ത്രി ജീന്‍ മൈക്കല്‍ ലുക്കോന്‍ഡെ തലസ്ഥാനത്ത് യോഗം വിളിച്ചുചേര്‍ത്തിട്ടുണ്ട്.



വിമാനത്താവളത്തില്‍ ലാവ എത്തിയതായി അധികൃതര്‍ അറിയിച്ചു. ഇരുപത് ലക്ഷം ജനസംഖ്യയുള്ള നഗരത്തില്‍നിന്ന് 10 കിലോമീറ്റര്‍ മാറിയുള്ള നയിരഗോംഗോ അഗ്‌നിപര്‍വതം 2002ല്‍ പൊട്ടിത്തെറിച്ച് 250 ഓളം പേര്‍ മരിച്ചിരുന്നു.

125,000 പേര്‍ ഭവന രഹിതരാകുകയും ചെയ്തു. ഇത്തവണ നഗര മധ്യത്തിലേക്ക് പ്രവേശിച്ചാല്‍ കനത്ത നാശനഷ്ടം സംഭവിക്കുമെന്നാണ് മുന്നറിയിപ്പ്.