രണ്ട്​ ദിവസമായി സോഷ്യല്‍ മീഡിയയിലെ താരമാണ്​ ജെനി ജെറോം എന്ന ​വനിത പൈലറ്റ്​. കേരളത്തിലെ തീരദേശത്തു നിന്നുള്ള ഏറ്റവും പ്രായം കുറഞ്ഞ ആദ്യ വനിത കൊമേഴ്​സ്യല്‍ പൈലറ്റാണ് ജെനിയെന്നായിരുന്നു സാമൂഹിക മാധ്യമങ്ങളിലും, മാധ്യമങ്ങളിലും നടന്ന ചര്‍ച്ച. മുഖ്യമന്ത്രി പിണറായി വിജയനും മുന്‍ ആരോഗ്യമന്ത്രി കെ.കെ. ശൈലജയും അടക്കം രാഷ്​ട്രീയ സാമൂഹിക മേഖലകളിലുള്ളവരും ഇത്തരം പോസ്​റ്റുകള്‍ ഇട്ടിരുന്നു.

എന്നാല്‍, മുഖ്യമന്ത്രിയടക്കം പിന്നീട്​ എഡിറ്റ്​ ചെയ്​തു. ഈ സമയത്ത്​ യു.എ.ഇയിലെ പൈലറ്റുമാരുടെ ഗ്രൂപ്പില്‍ മറ്റൊരു ചര്‍ച്ച നടക്കുന്നുണ്ടായിരുന്നു. സോഷ്യല്‍ മീഡിയ ചര്‍ച്ചകളില്‍ എന്തെങ്കിലും സത്യമുണ്ടോ ​ എന്നതായിരുന്നു വിഷയം. ഇല്ലെന്നാണ്​ എല്ലാ പൈലറ്റുമാരും തെളിവ്​ സഹിതം പറയുന്നത്​. ജെനിയുടെ നേട്ടത്തെ പ്രശംസിക്കുന്നതിനൊപ്പം സത്യം പുറത്തു വരണമെന്നും ഇവര്‍ ആഗ്രഹിക്കുന്നു.

​ശനിയാഴ്​ച രാത്രി ഷാര്‍ജയില്‍ നിന്ന്​ തിരുവനന്തപുരത്തേക്ക്​ പറന്ന എയര്‍ അറേബ്യ വിമാനമാണ്​ വാര്‍ത്തകളില്‍ ഇടം പിടിച്ചത്​. മലയാളി വനിത പൈലറ്റുമാരുടെ പട്ടിക തന്നെ നിരത്തിയാണ്​ മറ്റ്​ പൈലറ്റുമാര്‍ സോഷ്യല്‍ മീഡിയ വാദത്തെ പൊളിച്ചടുക്കിയത്​. കേരളത്തിലെ ആദ്യ വനിത പൈലറ്റായി പൊതുവെ അറിയുപ്പെടുന്നത്​ സബീഹ മരിക്കാര്‍ ആണ്​.

വര്‍ഷങ്ങള്‍ക്ക്​ മുന്‍പ്​ പൈലറ്റായ സബീഹക്ക്​ ശേഷം 50ഓളം മലയാളി വനിതകള്‍ ഈ സീറ്റിലേക്ക്​ എത്തിയിരുന്നു. അതേസമയം, തനിക്ക്​ മുന്‍പും വനിത പൈലറ്റുമാര്‍ കേരളത്തില്‍ നിന്ന്​ ഉണ്ടായിരുന്നോ എന്ന്​ സംശയമുണ്ടെന്ന്​ സബീഹ പറയുന്നു.

സോഷ്യല്‍ മീഡിയയുടെ മറ്റൊരു അവകാശവാദം കേരളത്തില്‍ നിന്നുള്ള ഏറ്റവും പ്രായം കുറഞ്ഞ വനിതാ പൈലറ്റാണ്​ ജെനി എന്നായിരുന്നു. എന്നാല്‍, 21ാം വയസില്‍ പൈലറ്റായ​ മാര്‍ട്ടിന സലിനും 22ാം വയസില്‍ ഈ സീറ്റിലേക്കെത്തിയ ഗീതു വിജയുമെല്ലാം 23കാരിയായ ജെനിയേക്കാള്‍ ഇളയതാണ്​. തീരദേശത്തു നിന്നുള്ള ആദ്യ പൈലറ്റാണ്​ ജെനിയെന്നതാണ്​ സോഷ്യല്‍ മീഡിയ ഏറ്റവുമധികം ആഘോഷിച്ചത്​.

മലപ്പറും താനൂരുള്ള അഫ്ര അബ്​ദുല്ല തീരദേശത്തു നിന്നുള്ള പൈലറ്റാണ്​ എന്ന മറുവാദവും പൈലറ്റുമാര്‍ ഉന്നയിക്കുന്നു. ദരിദ്ര കുടുംബത്തിലെ കുട്ടിയാണ്​ ഗീതുവെന്നതും ശരിയല്ല. ഏകദേശം ഒന്നര കോടി രൂപ ചെലവു വരുന്ന കോഴ്​സ്​ പൂര്‍ത്തിയാക്കിയാണ്​ ജെനി പൈലറ്റ്​ ലൈസന്‍സ്​ നേടിയത്​.

വര്‍ഷങ്ങളായി ഷാര്‍ജയിലാണ്​ താമസം. ആദ്യ കൊമേഴ്​സ്യല്‍ പൈലറ്റ്​ എന്നതും ശരിയല്ല. ജെ​നിയുടെ നേട്ടങ്ങൾ വളരെ വലുതാണ്, പ്രശംസ അർഹിക്കുന്നതുമാണ്. എന്നാല്‍, അനാവശ്യമായ ആഘോഷങ്ങള്‍ ​ഈ മേഖലയെ കുറിച്ച്‌​ തെറ്റിദ്ധാരണയുണ്ടാക്കുന്നുവെന്നുമാണ്​ മറ്റ്​ പൈലറ്റുമാര്‍ പറയുന്നത്​.

അതേസമയം, നല്‍കിയത്​ ഉറപ്പായ വിവരങ്ങള്‍ ആണെന്ന് ജെനിയുടെ പിതാവ് ജെറോം. വിവരങ്ങള്‍ ചോദിച്ചവരോട്​ തങ്ങള്‍ നല്‍കിയത്​ ഉറപ്പായ വിവരങ്ങള്‍ മാത്രമാണെന്ന്​ ജെനിയുടെ പിതാവ്​ ജെറോം 'ഗള്‍ഫ്​ മാധ്യമ'ത്തോട്​ പറഞ്ഞു. ജെനി കേരളത്തിലെ തീരദേശത്തു

നിന്നുള്ള ആദ്യ കൊമേഴ്​സ്യല്‍ വനിത പൈലറ്റാണെന്നാണ്​ വിശ്വാസം. ഒന്നര കോടി രൂപ മുടക്കിയാണ്​ പഠിച്ചത്​. സോഷ്യല്‍ മീഡിയയിലെത്തിയപ്പോള്‍ കൂടുതല്‍ മേമ്പൊടി ചേര്‍ത്തിട്ടുണ്ടാവാം. അതില്‍ ഞങ്ങള്‍ക്ക്​ പങ്കില്ലെന്നും ജെറോം പറയുന്നു.