വടക്കുകിഴക്കന്‍ ഇറ്റലിയിലെ ഒരു മലയോര ഗ്രാമമായ കുറോണ്‍ ഏഴു പതിറ്റാണ്ട് മുമ്പാണ് വെള്ളത്തിനടിയില്‍ മറഞ്ഞത്. 163 കുടുംബങ്ങള്‍ താമസിച്ചിരുന്ന ഗ്രാമം ജലവൈദ്യുത പദ്ധതിക്കായി ഗ്രാമവാസികളുടെ എതിര്‍പ്പു വകവയ്ക്കാതെ ജലസംഭരണിയാക്കി മാറ്റുകയായിരുന്നു.

വര്‍ഷങ്ങള്‍ക്കുശേഷം ഇതാദ്യമായി അറ്റകുറ്റപ്പണികള്‍ക്കു വേണ്ടി ജലസംഭരണി വറ്റിച്ചതോടെ ഇപ്പോള്‍ ഗ്രാമം വീണ്ടും ദൃശ്യമായിരിക്കുകയാണ്. ഗ്രാമം അപ്പാടെ വെള്ളത്തിനടിയിലായ ശേഷവും പതിനാലാം നൂറ്റാണ്ടില്‍ നിര്‍മിച്ച ഒരു പള്ളിയുടെ ഗോപുരം മാത്രം നശിക്കാതെ വെള്ളത്തിനുമുകളില്‍ തലയെടുപ്പോടെ നില്‍ക്കുന്നു.

മലനിരകളാല്‍ ചുറ്റപ്പെട്ട തടാകത്തിനു നടുവില്‍ ഉയര്‍ന്നു നില്‍ക്കുന്ന ഗോപുരം മനോഹരമായ കാഴ്ചയാണ് സമ്മാനിക്കുന്നത്. ശൈത്യകാലത്ത് തണുത്തുറഞ്ഞ വെള്ളത്തിനു നടുവില്‍ നില്‍ക്കുന്ന ഗോപുരം കാണാന്‍ വിനോദസഞ്ചാരികളും ധാരാളമായി ഇവിടെയെത്താറുണ്ട്.

തടാകം വറ്റിച്ചതോടെ ഏതാനും പടവുകളും പൊട്ടിപ്പൊളിഞ്ഞ നിലയിലുള്ള ഭിത്തികളും നിലവറകളും മാത്രമാണ് ഗ്രാമത്തിന്റെ ശേഷിപ്പായി ദൃശ്യമായത്.

ഗ്രാമത്തിന്റെ ഇരുവശത്തുമായി സ്ഥിതിചെയ്തിരുന്ന രണ്ടു തടാകങ്ങളെ ബന്ധിപ്പിക്കുന്നതിനു വേണ്ടിയാണ് ആയിരത്തില്‍ പരം ആളുകളെ ഒഴിപ്പിച്ച്‌ ജലസംഭരണി നിര്‍മിച്ചത്. ഇതോടെ ഗ്രാമവാസികള്‍ പല ഇടങ്ങളിലേക്ക് താമസം മാറ്റുകയായിരുന്നു.

അഞ്ച് മീറ്റര്‍ ആഴത്തില്‍ മാത്രമേ വെള്ളം നിറയ്ക്കൂ എന്നാണ് തുടക്കത്തില്‍ ജനങ്ങളെ അറിയിച്ചിരുന്നത്. എന്നാല്‍ പിന്നീട് ഭരണകൂടം ഈ വാക്ക് തെറ്റിക്കുകയും 22 മീറ്റര്‍ ആഴത്തില്‍ വെള്ളം നിറക്കുകയും ചെയ്തു.