പോളണ്ട് അതിർത്തിയിലെ ഷെഹ്നിയിൽ വിദ്യാർത്ഥികൾക്ക് നേരെ അതിക്രമം. യുക്രെയിൻ സേനയാണ് വിദ്യാർത്ഥികളെ അക്രമിച്ചത്. എല്ലാ രേഖകളുമായി അതിർത്തിയിലേക്ക് എത്തിയവരോട് ആണ് ക്രൂരത കാണിക്കുന്നത്. തന്നെ യുക്രെയിൻ സേന മർദിച്ചെന്ന് ഷെഹ്നിയിൽ നിന്നുള്ള മലയാളി വിദ്യാർത്ഥിനി എയ്ഞ്ചൽ ഒരു സ്വകാര്യ ചാനലിനോട് പറഞ്ഞു. അതിനിടയിൽ ഓപ്പറേഷൻ ഗംഗയിലൂടെ യുക്രെയിനിൽ നിന്നും ഇന്ത്യ രക്ഷപ്പെടുത്തിയ പൗരൻമാരിൽ പതിനൊന്ന് മലയാളികൾ കൊച്ചിയിലെത്തി. എത്തിയവരെല്ലാം വിദ്യാർത്ഥികളാണ്. നെടുമ്പാശേരി വിമാനത്താവളത്തിൽ ഉച്ചയോടെയാണ് ഇവർ എത്തിയത്. യുക്രെയിനിൽ നിന്നും മുംബയിലിറങ്ങിയ സംഘത്തിലുള്ളവരാണ് ഇവർ. വിമാനത്താവളത്തിൽ വിദ്യാർത്ഥികളെ സ്വീകരിക്കാൻ ബന്ധുക്കളടക്കമുള്ളവർ എത്തിയിരുന്നു.

യുദ്ധമുഖത്ത് നിന്നും രക്ഷപ്പെട്ടവരെ ചേർത്ത് പിടിച്ചപ്പോൾ പലരും വിങ്ങിപ്പൊട്ടി. നോർക്ക മുൻകൈ എടുത്താണ് ഇവരെ മുംബയിൽ നിന്നും നാട്ടിലെത്തിച്ചത്. ഈ യാത്രാ ചിലവ് സംസ്ഥാന സർക്കാർ വഹിച്ചു.തങ്ങളെ സുരക്ഷിതമായി നാട്ടിലെത്തിച്ച കേന്ദ്ര സംസ്ഥാന സർക്കാരുകൾക്ക് വിദ്യാർത്ഥികൾ നന്ദി പറഞ്ഞു. യുക്രെയിൻ റൊമാനിയൻ അതിർത്തിയിൽ ഇനിയും വിദ്യാർത്ഥികളുണ്ടെന്നും, വലിയ ബുദ്ധിമുട്ടിലാണ് അവരെന്നും തിരിച്ചെത്തിയ വിദ്യാർത്ഥികൾ പറഞ്ഞു.