യുക്രെയ്ന്‍-റഷ്യ സംഘര്‍ഷം അതിരൂക്ഷമാവുന്നതിനിടെ അന്താരാഷ്ട്ര വിപണിയില്‍ എണ്ണവില കുതിക്കുന്നു. ബ്രെന്റ് ക്രൂഡിന്റെ വില ബാരലിന് 116 ഡോളറായാണ് ഉയര്‍ന്നത്.

ഡബ്യു.ടി.ഐ ക്രൂഡിന്റെ വിലയും 110 ഡോളര്‍ പിന്നിട്ടു. 113 ഡോളറിലാണ് ഡബ്യു.ടി.ഐ ക്രൂഡിന്റെ വ്യാപാരം പുരോഗമിക്കുന്നത്. റഷ്യക്കുമേല്‍ കൂടുതല്‍ ഉപരോധം നിലവില്‍ വന്നതോടെയാണ് ഇന്നും എണ്ണവില കുതിച്ചത്.

പല കമ്പനികളും റഷ്യന്‍ എണ്ണ കാര്‍ഗോകള്‍ ഒഴിവാക്കാന്‍ നിര്‍ബന്ധതരാവുന്നുവെന്നാണ് റിപ്പോര്‍ട്ടുകള്‍. അതേസമയം, എണ്ണവില പിടിച്ചുനിര്‍ത്താന്‍ കരുതല്‍ ശേഖരം പുറത്തെടുക്കുന്നതിനുള്ള നടപടികളുമായി യു.എസ് മുന്നോട്ട് പോകുമെന്നും റിപ്പോര്‍ട്ടുകളുണ്ട്.

എന്നാല്‍, യു.എസ് നടപടി എണ്ണവില പിടിച്ച് നിര്‍ത്തില്ലെന്നാണ് റിപ്പോര്‍ട്ടുകള്‍. അതേസമയം, റഷ്യക്ക് മേല്‍ കൂടുതല്‍ ഉപരോധം നിലവില്‍ വരികയാണ്. ലോകബാങ്കാണ് പുതുതായി റഷ്യക്ക് മേല്‍ ഉപരോധം ഏര്‍പ്പെടുത്തിയത്.