യുക്രൈൻ്റെ തലസ്ഥാനമായ കീവിൽ നിന്നും 'ഓപ്പറേഷൻ ഗംഗ' രക്ഷാദൗത്യത്തിലൂടെ രക്ഷപ്പെട്ട അഭിജിത് കുട്ടിക്ക് ഗംഗ എന്ന പേര് നൽകും.
യുദ്ധം രൂക്ഷമായതോടെ കീവിൽ കുടുങ്ങുകയായിരുന്നു. ഗർഭിണിയായ ഭാര്യയുമായി പുറത്തിറങ്ങാൻ കഴിയാത്ത സാഹചര്യമായിരുന്നു. ഇതിനിടെ ഇന്ത്യൻ എംബസി ജീവനക്കാരുടെ സഹായത്തോടെ സുരക്ഷിതമായി പോളണ്ടിലെ റസെസോവിൽ എത്താനായെന്ന് യുവാവ് പറഞ്ഞു.

പോളണ്ടിൽ എത്തിയ തനും കുടുംബവും സുരക്ഷിതമായ സ്ഥലത്താണുള്ളതെന്ന് എഎൻഐയോട് അഭിജിത് വ്യക്തമാക്കി. "ഒമ്പത് മാസം ഗർഭിണിയായ ഭാര്യയെ പോളണ്ടിലെ ആശുപത്രിയിൽ പ്രവേശിപ്പിച്ചു. മാർച്ച് 26നാണ് ഭാര്യയുടെ ഡെലിവറി തീയതി. ഈ സാഹചര്യത്തിൽ കുഞ്ഞിന് ഗംഗ എന്ന പേരിടാൻ തീരുമാനിക്കുകയായിരുന്നു.

ഭാര്യയും കുഞ്ഞുങ്ങളും ആരോഗ്യത്തോടെയും സുഖമായിരിക്കുന്നുവെന്ന് ആശുപത്രിയിൽ നിന്നും മനസിലാക്കാനായി എന്നും അദ്ദേഹം വ്യക്തമാക്കി.അരോഗ്യ പ്രശ്നങ്ങൾ തുടരുന്നതിനാൽ ഭാര്യ പോളണ്ടിലെ ആശുപത്രിയിൽ തുടരുമെങ്കിലും താൻ ഇന്ത്യയിലേക്ക് എത്തുമെന്ന് അഭിജിത് പറഞ്ഞു. യുദ്ധം ആരംഭിച്ചതോടെ ഗർഭിണിയായ ഭാര്യയ്ക്കൊപ്പം കീവിൽ കുടുങ്ങുകയായിരുന്നു.

ഇതിനിടെ ഓപ്പറേഷൻ ഗംഗയുടെ ഭാഗമായി പ്രവർത്തിക്കുന്ന ഉദ്യോഗസ്ഥരുടെ സഹായത്തോടെ താനും കുടുംബവും പോളണ്ടിലേക്ക് എത്തുകയായിരുന്നു. കീവിൽ നിന്നും രക്ഷപ്പെടുത്തിയ ഇന്ത്യൻ സർക്കാരിനും ഞാൻ നന്ദി പറയുന്നുവെന്നും അഭിജിത് പറഞ്ഞു. കീവ് ലക്ഷ്യമാക്കി റഷ്യൻ സൈന്യം ആക്രമണം ശക്തമാക്കിയതോടെ റസ്റ്റോറൻ്റ് ഉടമയായ അഭിജിത്തും കുടുംബവും സുരക്ഷിതമായ സ്ഥലത്തേക്ക് മാറാനാകാതെ കുടുങ്ങുകയായിരുന്നു.

ഭാര്യ ഗർഭിണിയായതിനാൽ കാൽനടയായി അതിർത്തി പ്രദേശങ്ങളിലേക്ക് എത്താൻ കഴിയാത്ത സാഹചര്യമായിരുന്നു. തുടർന്ന് ഇന്ത്യൻ എംബസിയുടെ സഹായത്തോടെ പോളണ്ടിലെ റസെസോവിൽ എത്തുകയും പോളണ്ടിലെ ഇന്ത്യൻ എംബസി ഒരുക്കിനൽകിയ ഷെൽട്ടറിൽ എത്തുകയുമായിരുന്നു.