യുക്രെയ്‌നെതിരായ റഷ്യയുടെ യുദ്ധം തുടരുകയാണ്. ഈ സൈനിക നടപടികള്‍ക്ക് ഇടയില്‍ രാജ്യത്തെ പ്രതിരോധ പ്രവര്‍ത്തനങ്ങളുടെ ഭാഗമായി ആയുധം കൈകളിലേന്തിയ 26കാരി വാര്‍ത്തകളില്‍ ഇടം പിടിക്കുകയാണ്. ഫെബ്രുവരി 24ന് റഷ്യ യുദ്ധം പ്രഖ്യാപിക്കുന്നതിന് മുമ്ബ് മാര്‍ക്കറ്റിംഗ് ജോലി ചെയ്തിരുന്നയാളാണ് അലീന.

എന്നാല്‍ രാജ്യം റഷ്യയെ പ്രതിരോധിക്കാന്‍ പാടുപെട്ടപ്പോള്‍ സൈന്യത്തിന്റെ ഭാഗമാകാനായിരുന്നു അലീനയുടെ തീരുമാനം. ഇപ്പോള്‍ കീവിന് സമീപമുള്ള ചെക്ക് പോയിന്റില്‍ ടെറിട്ടോറിയല്‍ ഡിഫന്‍സ് യൂണിറ്റിനൊപ്പം വിന്യസിക്കപ്പെട്ടിരിക്കുകയാണ് ഈ 26കാരി.

ആയുധം എങ്ങനെ കൈകാര്യം ചെയ്യണമെന്ന് തനിക്കറിയാം. ആവശ്യമെങ്കില്‍ റഷ്യക്കാര്‍ക്കെതിരെ തീര്‍ച്ചയായും പോരാടുമെന്നും എകെ47 കൈകളിലേന്തിയ അലീന പ്രതികരിച്ചു. എല്ലാ സൈനികരും വളരെ ദയയുള്ളവരാണ്.

എല്ലാ നാട്ടുകാരും യുക്രെയ്‌നെ പിന്തുണയ്ക്കുന്നവരാണ്. കൂടാതെ സൈന്യത്തെ സഹായിക്കാന്‍ കഴിയുന്നതെല്ലാം ചെയ്യാന്‍ ആഗ്രഹിക്കുന്നവരാണവര്‍. കാരണം യുക്രെയ്‌ന്റെ ഭാവിയെക്കുറിച്ച് അവര്‍ ആശങ്കയിലാണെന്നും അലീന മാദ്ധ്യമങ്ങളോട് പറഞ്ഞു.