ചൈനീസ് കമ്മ്യൂണിസ്റ്റ് പാര്‍ട്ടിയുടെയും ചൈനയുടെയും പരമാധികാരം ഒരു കൈകളിലേയ്‌ക്കെത്തുന്നതിന്റെ അവസാനത്തെ കടമ്പയു കടന്നു. ഇന്ത്യയുള്‍പ്പടെയുള്ള ലോകരാഷ്ട്രങ്ങള്‍ ആകാംക്ഷയോടെ കാത്തിരുന്ന ചൈനയുടെ തലപ്പത്തേയ്ക്ക് ചോദ്യം ചെയ്യപ്പെടാന്‍ കഴിയാ്ത്ത നതാവായി ഷി ചിന്‍പിങ് തന്നെ എത്തിയിരിക്കുന്നു.
ചൈനയുടെ പ്രസിഡന്റായി മൂന്നാം തവണയും തുടരാന്‍ ഷി ചിന്‍പിങ്ങിന് (69) പാര്‍ലമെന്റായ നാഷനല്‍ പീപ്പിള്‍സ് കോണ്‍ഗ്രസ് കഴിഞ്ഞ ദിവസം അംഗീകാരം നല്കി. 2952 അംഗ എന്‍പിസിയുടെ തീരുമാനം ഏകകണ്ഠമായിരുന്നു.

ചൈനീസ് കമ്യൂണിസ്റ്റ് പാര്‍ട്ടി തീരുമാനങ്ങള്‍ക്ക് ഔദ്യോഗിക അംഗീകാരം നല്‍കുക എന്ന ചുമതല മാത്രമാണ് എന്‍പിസിക്കുള്ളത്.ഒരാള്‍ക്കു രണ്ടുവട്ടം എന്ന ഭരണഘടനാവ്യവസ്ഥ ഭേദഗതി ചെയ്താണു മൂന്നാം വട്ടവും പാര്‍ട്ടി ജനറല്‍ സെക്രട്ടറിയായും പ്രസിഡന്റായും തുടരാന്‍ കഴിഞ്ഞ ഒക്ടോബറില്‍ പാര്‍ട്ടി കോണ്‍ഗ്രസും കേന്ദ്രകമ്മിറ്റിയും ഷിക്ക് അനുമതി നല്‍കിയത്.

അതേസമയം ചൈനയുടെ പ്രധാനമന്ത്രിയായി ലി ചിയാങ് (63) അധികാരമേറ്റു. ഷാങ്ഹായ് പ്രവിശ്യയിലെ കമ്യൂണിസ്റ്റ് പാര്‍ട്ടി മുന്‍ സെക്രട്ടറിയായ ലി ചിയാങ് പ്രസിഡന്റ് പ്രസിഡന്റ് ഷി ചിന്‍പിങ്ങിന്റെ വിശ്വസ്തനാണ്. 2013 മുതല്‍ പ്രധാനമന്ത്രിയായിരുന്ന ലീ കെചിയാങിന്റെ പിന്‍ഗാമിയാണ്.

ചൈനീസ് പാര്‍ലമെന്റായ നാഷനല്‍ പീപ്പിള്‍സ് കോണ്‍ഗ്രസിന്റെ സമ്മേളനത്തില്‍, പ്രസിഡന്റായി മൂന്നാം തവണയും അംഗീകാരം ലഭിച്ചതിനു പിന്നാലെ ഷി ചിന്‍പിങ് തന്നെയാണ് പുതിയ പ്രധാനമന്ത്രിയെ നിര്‍ദേശിച്ചത്. 2947 പാര്‍ലമെന്റ് അംഗങ്ങളില്‍ 2,936 പേര്‍ പിന്തുണച്ചു. 3 പേര്‍ എതിര്‍ത്ത് വോട്ട് ചെയ്തപ്പോള്‍ 8 പേര്‍ വിട്ടുനിന്നു.

ഷിയുടെ രാഷ്ട്രീയ വളര്‍ച്ചയുടെ ആദ്യനാളുകള്‍ മുതല്‍ ഒപ്പമുണ്ടായിരുന്ന ലി ചിയാങ്, ഷീ പാര്‍ട്ടി ഷെജിയാങ് പ്രവിശ്യാ സെക്രട്ടറിയായിരുന്നപ്പോള്‍ അദ്ദേഹത്തിന്റെ വലംകയ്യായിരുന്നു. 2011 ല്‍ പ്രവിശ്യയുടെ രാഷ്ട്രീയനിയമകാര്യ സെക്രട്ടറിയും 2013 പ്രവിശ്യാ ഗവര്‍ണറുമായി. 2019 ല്‍ പാര്‍ട്ടിയുടെ ഷാങ്ഹായ് ഘടകം തലവനായി.

ചൈനയിലെ ഏറ്റവും വലിയ നഗരമായ ഷാങ്ഹായിയില്‍ കോവിഡ് പ്രതിസന്ധി കൈകാര്യം ചെയ്തതിന്റെ പേരില്‍ പരക്കെ വിമര്‍ശനമേറ്റുവാങ്ങിയതാണ് ലീ. എന്നിട്ടും സീറോ കോവിഡ് നിയന്ത്രണങ്ങളും വഷളായ വിദേശ ബന്ധവും മൂലം തകര്‍ന്ന ലോകത്തിലെ രണ്ടാമത്തെ വലിയ സമ്പദ്വ്യവസ്ഥയെ പുനരുജ്ജീവിപ്പിക്കാനുള്ള പുതിയ ദൗത്യം ലഭിക്കുന്നത് ഷീയുടെ വിശ്വസ്തനായതുകൊണ്ടു മാത്രമാണ്. 2 ടേമിലായി 10 വര്‍ഷം പൂര്‍ത്തിയാക്കിയ ശേഷമാണ് പ്രധാനമന്ത്രി ലീ കെചിയാങ് (67) പടിയിറങ്ങുന്നത്.

അങ്ങനെ അധികാരത്തിന്റെ എല്ലാ വശങ്ങളും എല്ലാ അര്‍ത്ഥത്തിലും ഷീയുടെ കൈകളിലെത്തിയിരിക്കുന്നു. വര്‍ഷങ്ങളായി ചൈനീസ് കമ്മ്യൂണിസ്റ്റ് പാര്‍്ട്ടിയില്‍ ഇത്തരത്തിലുള്ള ഏകാധിപത്യത്തിനായി ഷീ ശ്രമിച്ചു കൊണ്ടിരിക്കുകയാണ്. ജനപ്രതിനിധിസഭയ്‌ക്കോ പാര്‍ലമെന്റിനോ യാതൊരു സ്വധീനവും നല്കാതെ തന്റെ കൈകളില്‍ അധികാരം ഭദ്രമായി നിലനിറുത്തുന്നതിന് കമ്മ്യൂണിസ്റ്റ് ഭരണഘടനയെ പലതവണ ഷീ മാറ്റി മറിച്ചിട്ടുണ്ട്. ഒടുവില്‍ എ്ല്ലാം ഷീയുടെ കൈകളിലെത്തി നിലിക്കുകയാണ്. അധികാരം ഒരു കേന്ദ്രത്തിലെത്തുന്നത് നവ കമ്മ്യൂണിസ്റ്റ് ശൈലിയായി ലോകത്തിന്റെ മുന്നില്‍ അവതരിപ്പിക്കാന്‍ കഴിഞ്ഞു എന്നതാണ് ഷീയുടെ നേട്ടം.

ഇനി ലോകകാര്യങ്ങളില്‍ ഷീയുടെ നിലപാടുകള്‍ പ്രാധാന്യമര്‍ഹിക്കുന്നതായിരിക്കും. കാരണം തീരുമാനങ്ങള്‍ ഷീ ഒറ്റയ്‌ക്കെടുത്തേക്കാം എന്നു ഭയക്കുന്നവരുമുണ്ട്. പ്രത്യേകിച്ച് ഇന്ത്യയാണ് ചൈനയുടെ ഏത് നീക്കത്തേയും നിരീക്ഷിക്കുന്നത്. നിരന്തരം ഇന്ത്യയുടെ അതിര്‍്ത്തി മേഖലകളില്‍ ചൈന പ്രശ്‌നം സൃഷ്ടിച്ചു കൊണ്ടിരിക്കുകയാണ്. ഇന്ത്യയെ തകര്‍ക്കാനായി പാകിസ്ഥാന് കൈവിട്ട് സഹായിക്കുകയും പാകിസ്ഥാനില്‍ കോടികള്‍ ചിലവാക്കി റോഡും അനുബന്ധ സൗകര്യങ്ങളും ഒരുക്കുന്നതിലൂടെ ഇന്ത്യയിലേയ്ക്കുള്ള പാത വെട്ടി തുറക്കുകയാണെന്നും വിലയിരുത്തപ്പെട്ടിരുന്നു.

റഷ്യ-യക്രൈന്‍ യുദ്ധത്തില്‍ റഷ്യയ്ക്ക് വലംകൈയ്യായി നില്ക്കുന്നത് ചൈനയാണ്. യുക്രൈന്‍ യുദ്ധം അവസാനിപ്പിക്കാന്‍ ലോകരാജ്യങ്ങളെല്ലാം ഒറ്റക്കെട്ടായി ശ്രമിക്കുമ്പോള്‍ ചൈനമാത്രം റഷ്യയെ പിന്‍തുണച്ചു കൊണ്ടിരിക്കുന്നു. യൂറോപ്യന്‍ യൂണിയന്‍ യുക്രൈന് എല്ലാവിധ സഹായങ്ങളും നല്കുമ്പോള്‍ ചൈനയാകട്ടെ റഷ്യയ്ക്കാണ് സൈനീക പന്‍ബലം നല്കുന്നത്. ചൈന മധ്യസ്ഥനായി നിന്നു കൊണ്ട് ഉക്രൈന്‍ യുദ്ധം അവസാനിപ്പിക്കണമെന്ന് യുക്രൈന്‍ പല അന്താരാഷ്ട്ര യോഗങ്ങളില്‍ ആവശ്യപ്പെട്ടിട്ടുണ്ട്. എന്നാല്‍ അതിന് പ്രതികാരമായി ചൈന റഷ്യന്‍ പ്രസിഡന്റ് പുടിനെ ചൈനയിലേയ്ക്ക് ക്ഷണിച്ചിരിക്കുകയാണ്. റഷ്യ, ചൈന അച്ചുതണ്ടു ശക്തികളായി നിന്നു കൊണ്ട് ലോകത്തെ വെല്ലുവിളിക്കാനാണ് തയ്യാറെടുക്കന്നതെന്ന ചിത്രമാണിപ്പോള്‍ തെളിഞ്ഞു വരുന്നത്.