പൊതുയിടങ്ങളിൽ നാം പാലിക്കേണ്ട ചില മര്യാദകളുണ്ട്. ഇത് ലംഘിച്ച് പെരുമാറുന്ന ഒട്ടനവധി സംഭവങ്ങളാണ് അടുത്തിടെയായി പുറത്തുവരുന്നത്. വിമാനത്തിനുള്ളിൽ യാത്രക്കാരുടെ മോശം പെരുമാറ്റം അതിരുവിടുകയാണ്. മദ്യപിച്ച് വിമാനത്തിലെ ജീവനക്കാരെ കൈയ്യേറ്റം ചെയ്യുക, മറ്റ് യാത്രക്കാർക്ക് ബുദ്ധിമൂട്ട് ഉണ്ടാക്കുന്ന രീതിയിൽ പെരുമാറുക, മദ്യപിച്ച് ബഹളം വയ്ക്കുക, സഹയാത്രികയു‌ടെ ദേഹത്ത് മൂത്രമൊഴിക്കുക,അടിപിടി ഉണ്ടാക്കുക, പുകവലിക്കുക, എന്നുവേണ്ട ഇത്തരത്തിൽ യാത്രക്കാരുടെ മോശം പെരുമാറ്റം സംബന്ധിച്ച വാർത്ത അടുത്തിടെയായി കൂടിവരികയാണ്.

ഇപ്പോൾ ഇതാ  ദുബായിൽ നിന്ന് കോഴിക്കോട്ടേക്ക് പുറപ്പെട്ട വിമാനം യാത്രക്കാരൻ മദ്യപിച്ചു ബഹളമുണ്ടാക്കിയതിനെത്തുടർന്ന് തിരിച്ചിറക്കി    . പോലീസെത്തി യാത്രക്കാരനെകൊണ്ടുപോയി. ശേഷമായിരുന്നു  വിമാനം വീണ്ടും പുറപ്പെട്ടത്.ഞായറാഴ്ച പുലർച്ചെ ഒന്നരയ്ക്ക് ദുബായിൽനിന്ന് കോഴിക്കോട്ടേക്ക് പുറപ്പെട്ട ഫ്ളൈ ദുബായ് വിമാനത്തിലാണ് നാടകീയമായ സംഭവങ്ങൾ. 

വേങ്ങര സ്വദേശിയായ യാത്രക്കാരനാണ് മദ്യപിച്ച് ബഹളമുണ്ടാക്കിയതെന്ന് സഹയാത്രക്കാർ പറഞ്ഞു. വിമാനം ദുബായിൽനിന്ന് പുറപ്പെട്ടശേഷവും ഇയാൾ ബഹളം തുടർന്നു. മറ്റുയാത്രക്കാർക്ക് ശല്യമായതോടെ വിമാനം തിരികെയിറക്കുകയായിരുന്നു. യാത്രക്കാരിൽനിന്ന് വിവരങ്ങൾ ശേഖരിച്ചശേഷമാണ് ഇയാളെ ദുബായ് പോലീസ് കൊണ്ടുപോയത്.