സുഡാനില്‍ ജനവാസ മേഖലയില്‍ സൈനിക വിമാനം തകര്‍ന്നുവീണ് 46 പേര്‍ക്ക് ദാരുണാന്ത്യം
സുഡാനില്‍ ജനവാസ മേഖലയില്‍ സൈനിക വിമാനം തകര്‍ന്നുവീണ് 46 പേര്‍ക്ക് ദാരുണാന്ത്യം. സുഡാന്‍ തലസ്ഥാനത്തെ ഇരട്ട നഗരമായ ഓംദുര്‍മാനിലെ സൈനിക വിമാനത്താവളത്തിന് സമീപമാണ് വിമാനം തകര്‍ന്നുവീണത്. നാല്‍പ്പത്തിയാറ് പേര്‍ മരിച്ചതായി ഖാര്‍ത്തൂം സ്റ്റേറ്റ് മീഡിയ ഓഫീസ് അറിയിച്ചു. മരിച്ചവരില്‍ ഒരു മുതിര്‍ന്ന കമാന്‍ഡറും ഉള്‍പ്പെടുന്നതായി സൈനിക വൃത്തങ്ങള്‍ അറിയിച്ചു.
വടക്കന്‍ ഓംദുര്‍മാനിലെ വാദി സയ്ദ്ന സൈനിക വിമാനത്താവളത്തിന് സമീപം ചൊവ്വാഴ്ച വൈകിട്ടാണ് അപകടം നടന്നത്. സംഭവത്തില്‍ നിരവധി സൈനികരും സാധാരണക്കാരും കൊല്ലപ്പെട്ടതായി സുഡാന്‍ സൈന്യം പറഞ്ഞിരുന്നെങ്കിലും കൂടുതല്‍ വിവരങ്ങള്‍ നല്‍കിയില്ല.
സാങ്കേതിക കാരണങ്ങളാലാണ് വിമാനാപകടം സംഭവിക്കാന്‍ സാധ്യതയെന്നാണ് സൈനിക വൃത്തങ്ങള്‍ പറയുന്നത്. 10 പേര്‍ക്ക് പരിക്കേറ്റതായും മീഡിയ ഓഫീസ് അറിയിച്ചു. കൊല്ലപ്പെട്ടവരില്‍ കാര്‍ട്ടൂമിലെ ഒരു മുതിര്‍ന്ന കമാന്‍ഡറായ മേജര്‍ ജനറല്‍ ബഹര്‍ അഹമ്മദ് ഉള്‍പ്പെടുന്നു, അദ്ദേഹം മുമ്പ് തലസ്ഥാനം മുഴുവന്‍ സൈന്യത്തിന്റെ കമാന്‍ഡറായി സേവനമനുഷ്ഠിച്ചിരുന്നുവെന്ന് സൈനിക വൃത്തങ്ങള്‍ അറിയിച്ചു.
https://www.facebook.com/Malayalivartha
