ഇനി വെറും മണിക്കൂറുകൾ മാത്രമാണ് ശേഷിക്കുന്നത് . വാന നിരീക്ഷകര്‍ കാത്തിരിക്കുന്ന ഈ വര്‍ഷത്തെ രണ്ടാമത്തെയും അവസാനത്തെയും സൂര്യഗ്രഹണം ഇന്ന്. ഭാഗിക സൂര്യഗ്രഹണമാണ് നടക്കാനിരിക്കുന്നത്. പൂർണ്ണ ഗ്രഹണത്തെപ്പോലെ ഭൂമിയെ കൂരിരുട്ടിലാക്കില്ലെങ്കിലും മനോഹരമായ കാഴ്ചയാണ് ഭാഗിക സൂര്യഗ്രഹണവും വാഗ്ദാനം ചെയ്യുന്നത്. മാത്രമല്ല, ആഴത്തിലുള്ള ഭാഗിക ഗ്രഹണമാണ് നടക്കുക. സൂര്യന്റെ 86% ഭാഗം വരെ ഗ്രഹണ സമയത്ത് ചന്ദ്രൻ മൂടുകയും ചെയ്യും.

EarthSky.org ൽ നിന്നുള്ള ഡാറ്റ അനുസരിച്ച്, ഗ്രഹണം മണിക്കൂറുകളോളം നീണ്ടുനിൽക്കും. അതേസമയം, ദക്ഷിണാർദ്ധഗോളത്തിൽ ഉടനീളം ദൃശ്യമാകുന്ന ഗ്രഹണം ഇന്ത്യയില്‍ ദൃശ്യമാകില്ല. ഭൂമിക്കും സൂര്യനും ഇടയിൽ ചന്ദ്രൻ കടന്നുപോകുമ്പോൾ സൂര്യപ്രകാശത്തിന്റെ ഒരു ഭാഗമോ അല്ലെങ്കിൽ മുഴുവൻ ഭാഗമോ ഭൂമിയിലേക്ക് എത്തുന്നത് തടയുന്നതാണ് സൂര്യഗ്രഹണം. ചന്ദ്രൻ സൂര്യന്റെ ഒരു ഭാഗം മാത്രം മൂടുമ്പോഴാണ് ഭാഗിക സൂര്യഗ്രഹണം സംഭവിക്കുന്നത്.ഇന്ത്യന്‍ സമയപ്രകാരം ഇന്നും നാളെയുമായിട്ടാണ് (2025 സെപ്റ്റംബർ 21, 22) ഗ്രഹണം നടക്കുന്നത്. അന്താരാഷ്ട്രസമയക്രമം

(UTC) 17:29 ന് (ഇന്ത്യയില്‍ സെപ്റ്റംബർ 21 രാത്രി 10.59) ഗ്രഹണം ആരംഭിക്കും. 19:41 ന് (ഇന്ത്യയില്‍ സെപ്റ്റംബർ 22 ,1:11 am) ഉച്ചസ്ഥായിയിലെത്തുന്ന ഗ്രഹണം 21:53 ന് (ഇന്ത്യയില്‍ സെപ്റ്റംബർ 22, 3:23 am) അവസാനിക്കുകയും ചെയ്യും. ഇന്ത്യയില്‍ ഈ സമയം രാത്രിയായതിനാലാണ് ഗ്രഹണം കാണാന്‍ സാധിക്കാത്തത്.പുലർച്ചെ 1.11 ഓടെ ചന്ദ്രൻ സൂര്യന്റെ ഭൂരിഭാഗവും മൂടുന്ന ഘട്ടമുണ്ടാകും. ഈ സമയം കൃത്യമായ നേത്രസംരക്ഷണം നടത്തി മാത്രമേ സൂര്യഗ്രഹണം നിരീക്ഷിക്കാവൂ.

സ്‌പേസ് ഡോട്ട് കോമിന്റെ റിപ്പോർട്ടനുസരിച്ച് അന്റാർട്ടിക്കയിൽ പുലർച്ചെ 4.49 മുതൽ വൈകുന്നോരം 6.53 വരെയും ഓസ്‌ട്രേലിയയിൽ രാവിലെ 6.13 മുതൽ രാവിലെ 7.36 വരെയും സൂര്യഗ്രഹണം ദൃശ്യമാകും. ന്യൂസിലൻഡിൽ രാവിലെ 5.41 മുതൽ രാവിലെ 8.36 വരെയും ദൃശ്യമാകും. അതേസമയം, ഇന്ത്യയിൽ സൂര്യഗ്രഹണം ദൃശ്യമാകില്ല. ഓൺലൈൻ ലൈവ് സ്ട്രീമുകൾ വഴി ഇന്ത്യയിലുളളവർക്ക് സൂര്യഗ്രഹണം നിരീക്ഷിക്കാവുന്നതാണ്.

ഓസ്‌ട്രേലിയ, അന്റാർട്ടിക്ക, പസഫിക് സമുദ്ര ഭാഗങ്ങൾ, അറ്റ്‌ലാന്റിക് എന്നിവിടങ്ങളിൽ ഗ്രഹണം ദൃശ്യമാകും. ഓസ്‌ട്രേലിയയിൽ പ്രാദേശിക സമയം രാവിലെ 6.13 മുതൽ 7.36 വരെയും, ന്യൂസിലൻഡിൽ രാവിലെ 5.41 മുതൽ 8.36 വരെയും ഇത് കാണാം.ഏഷ്യൻ ഭൂഖണ്ഡത്തിൽ ഇന്ത്യയെ കൂടാതെ പാകിസ്ഥാൻ, ശ്രീലങ്ക, നേപ്പാൾ, അഫ്‌ഗാനിസ്ഥാൻ എന്നിവിടങ്ങളിലും ഗ്രഹണം ദൃശ്യമാകില്ല. വടക്കേ അമേരിക്ക, ലാറ്റിൻ അമേരിക്ക എന്നിവിടങ്ങളിലും ഇത് കാണാനാവില്ല.2025ലെ അവസാന സൂര്യഗ്രഹണത്തിനു ശേഷം അടുത്ത ഗ്രഹണം 2026 ഫെബ്രുവരി 17ന് നടക്കും. ഇത് വലയ സൂര്യഗ്രഹണമായിരിക്കും. 2027 ഓഗസ്റ്റ് രണ്ടിന് സമ്പൂർണ സൂര്യഗ്രഹണം പ്രതീക്ഷിക്കുന്നു.