സ്വന്തം കാര്യം നോക്കിയാല്‍ മതി, അനാവശ്യ കാര്യങ്ങളില്‍ ഇടപെടേണ്ട, ചൈനക്ക് താക്കീതുമായി ഇന്ത്യന്‍ സൈന്യം
ഇന്ത്യ ചൈന അതിര്‍ത്തിയില്‍ ടാങ്കുകളും, സൈന്യത്തെയും വിന്യസിപ്പിക്കുന്നതിനെതിരെ ചൈന നടത്തിയ പ്രസ്താവനകള്‍ക്കു മറുപടിയുമായി ഇന്ത്യന്‍ സൈന്യം. ഇന്ത്യക്കകത്ത് സൈനിക വിന്യാസം നടത്താനും സുരക്ഷാ മുന്‍ കരുതലെടുക്കാനും പുറത്ത് നിന്നാരുടെയും അനുവാദം ആവശ്യമില്ലെന്ന് മുതിര്‍ന്ന സൈനിക ഉദ്യോഗസ്ഥന്‍ അറിയിച്ചു.
ചൈനയുമായി അതിര്‍ത്തി പങ്കിടുന്ന അരുണാചല്‍ പ്രദേശില്‍ ബ്രഹ്മോസ് മിസൈല്‍ യൂണിറ്റ് സ്ഥാപിക്കാനുള്ള ഇന്ത്യന്‍ സൈന്യത്തിന്റെ തീരുമാനം അതിര്‍ത്തിയില്‍ സമാധാനം തകര്‍ക്കുമെന്ന് കഴിഞ്ഞ ദിവസം ചൈനീസ് സൈനിക വക്താവ് ആരോപിച്ചിരുന്നു. ഇന്ത്യയുടെ സ്വയം പ്രതിരോധ സംവിധാനങ്ങളുടെ പരിധി ലംഘിക്കുന്നതാണ് ഇതെന്നും ചൈന ആരോപിച്ചിരുന്നു.
ഇന്ത്യയും റഷ്യയും സംയുക്തമായി വികസിപ്പിച്ച സൂപ്പര്‍ സോണിക് ക്രൂയിസ് മിസൈലാണ് ബ്രഹ്മോസ്. കരയില്‍ നിന്നും കടലില്‍ നിന്നും ആകാശത്ത് നിന്നും വിക്ഷേപിക്കാന്‍ കഴിയുന്ന ബ്രഹ്‌മോസിന് 300 കിലോയോളം സ്‌ഫോടക വസ്തുക്കളും വഹിക്കാനുള്ള ശേഷിയുണ്ട്. നേരത്തെ ഇന്ത്യ ചൈനയുമായി അതിര്‍ത്തി പങ്കിടുന്ന പ്രദേശങ്ങളില്‍ സൈന്യത്തെ വിന്യസിപ്പിച്ചിരുന്നു. ഇന്ത്യയുടെ അതിര്‍ത്തികളില്‍ കൈയേറി ചൈന അധിനിവേശം ശക്തിപ്പെടുത്തുന്ന സാഹചര്യത്തിലായിരുന്നു ഈ തീരുമാനം.
https://www.facebook.com/Malayalivartha
