ശാസ്ത്രം ഇത്രയേറെ പുരോഗതിയിലെത്തിയിട്ടും ഇത് വരെ മനുഷ്യന് മറുപടിയില്ലാത്ത ചോദ്യമായി നില്‍ക്കുന്നതാണ് അന്യഗ്രഹ ജീവികള്‍. മനുഷ്യന്റെ കഴിവുകള്‍ മുഴുവന്‍ ഉപയോഗിച്ച് പരീക്ഷണങ്ങളും അന്വേഷണങ്ങളും നടത്തിയിട്ടും ഇത് വരെ ശരിയായൊരു ഉത്തരം കണ്ടെത്താന്‍ കഴിയാത്ത വിഭാഗമാണ് അന്യഗ്രഹ ജീവികളെപ്പറ്റിയുള്ളത്. ഹോളീവുഡിലും ബോളീവുഡിലും ബോക്‌സ് ഓഫിസിനെ ഇളക്കി മറിച്ച ഒട്ടേറെ സിനിമകളും ഇതേ വിഷയത്തില്‍ ഇറങ്ങിയിട്ടുമുണ്ട്. നിരവധി വീഡിയോകളും ചിത്രങ്ങളും യൂട്യുബിലും, ഇന്റര്‍നെറ്റിലും ഇപ്പോള്‍ സോഷ്യല്‍ മീഡിയകള്‍ വഴിയും പ്രചരിക്കുന്നുമുണ്ട്.

അതെ സമയം കഴിഞ്ഞ ദിവസം ചൊവ്വയില്‍ നിന്നും കണ്ടെത്തിയ ഒരു ചിത്രമാണ് ഇപ്പോള്‍ ചൂടന്‍ ചര്‍ച്ചകള്‍ക്കു വിഷയമായിരിക്കുന്നത്. നാസയുടെ ചൊവ്വ പര്യവേഷണ പേടകമായ ഓപ്പര്‍ച്യൂണിറ്റി അയച്ചുകൊടുത്ത ഒരു ചിത്രം ചൂടേറിയ വാഗ്വാദങ്ങള്‍ക്ക് വഴിവച്ചിരിക്കുകയാണ്. നാസയുടെ ചൊവ്വ പര്യവേഷണ പേടകമായ ഓപ്പര്‍ച്യൂണിറ്റി 2004ല്‍ ആണു ചുവന്ന ഗ്രഹത്തിലെത്തിയത്. അന്നുമുതല്‍ പേടകം ഭൂമിയിലേക്ക് അയച്ചുകൊണ്ടിരിക്കുന്ന ചിത്രങ്ങള്‍ പലര്‍ക്കും കൗതുകമായിരുന്നു. പേടകം അയച്ചുകൊടുത്ത ചിത്രങ്ങളില്‍ ഷൂസ് എന്നു തോന്നിപ്പിക്കുന്ന ഒരു ചിത്രം കിട്ടിയിട്ടുണ്ട്. യുഎഫ്ഒ സൈറ്റിംഗ്സ് എന്ന ബ്ലോഗിലാണ് ഇതു സംബന്ധിച്ചുള്ള പോസ്റ്റ് പ്രത്യക്ഷപ്പെട്ടിരിക്കുന്നത്. ചൊവ്വയില്‍ യുദ്ധത്തില്‍ ഏര്‍പ്പെട്ടിരിക്കുന്ന ഒരു വിചിത്രവര്‍ഗം ഉണ്ടായിരുന്നു. അതിന്റെ തെളിവാണ് ഈ ഷൂസ് എന്നാണു ബ്ലോഗിന്റെ സ്ഥാപകനായ സ്‌കോട്ട് സി വാറിംഗ് അവകാശപ്പെടുന്നത്.

2013ല്‍ എടുത്ത ഈ ഫോട്ടോ ഈ വര്‍ഷമാണു ശ്രദ്ധയില്‍ പെടുന്നത്. ചൊവ്വയുടെ രാജാവിന്റെ ഇടത്തെ കാലിലെ ഷൂ ആണിത്-അദ്ദേഹം പറയുന്നു. പേടകം അയച്ച പല ഫോട്ടോകളിലും അന്യഗ്രഹജീവികള്‍ ഉണ്ട് എന്നതിന്റെ തെളിവുകള്‍ ഒളിഞ്ഞുകിടപ്പുണ്ടെന്ന വാദവുമായി നേരത്തെയും പലരും രംഗത്തെത്തിയിരുന്നു.