ഏയ്ഞ്ചല മെര്‍ക്കലിനെ വധിക്കാനുള്ള ശ്രമം ചെക്ക് പോലീസ് പരാജയപ്പെടുത്തി
ചെക് റിപ്പബ്ലിക്കില്‍ സന്ദര്‍ശനത്തിനെത്തിയ ജര്‍മന്‍ ചാന്‍സിലര്‍ ഏയ്ഞ്ചല മെര്‍ക്കലിനെ വധിക്കാനുള്ള ശ്രമം ചെക് പോലീസ് പരാജയപ്പെടുത്തി. തലസ്ഥാന നഗരമായ പ്രേഗില്‍ മെര്‍ക്കലിന്റെ വാഹനവ്യൂഹം കടന്നുപോകവെ കറുത്ത മെഴ്‌സിഡസ് കാറില്‍ എത്തിയ ആയുധ ധാരിയായ ഒരാള്‍ വാഹനവ്യൂഹത്തിന്റെ ഇടയില്‍കയറാന്‍ ശ്രമിച്ചു. എന്നാല്‍, ചെക് പോലീസിന്റെ അവസരോചിത ഇടപെടലിലൂടെ ഇയാളെ അറസ്റ്റ് ചെയ്യുകയായിരുന്നു എന്നാണ് റിപ്പോര്‍ട്ട്. ഗുരുതര സുരക്ഷാ വീഴ്ചയാണ് ഉണ്ടായിരിക്കുന്നത്.
സംഭവത്തെക്കുറിച്ച് പ്രേഗ് ഡിറ്റക്ടീവ് സംഘം അന്വേഷണം ആരംഭിച്ചു. ചെക് പ്രധാനമന്ത്രി ബൊഹുസ്ലാവ് സൊബൊത്കയുമായി കൂടിക്കാഴ്ച നടത്താനാണ് മെര്‍ക്കല്‍ എത്തിയത്. പ്രേഗ് വിമാനത്താവളത്തില്‍നിന്ന് നഗരത്തിലേക്കു പോകുംവഴിയാണ് മെര്‍ക്കലിന്റെ വാഹനവ്യൂഹത്തിനിടയില്‍ കടന്നു കയറാന്‍ ആയുധധാരി വിഫല ശ്രമം നടത്തിയത്.
കഴിഞ്ഞ ഒരു വര്‍ഷത്തിനുള്ളില്‍ യൂറോപ്പിന്റെ വിവിധ ഭാഗങ്ങളില്‍ ഭീകരാക്രമണങ്ങള്‍ നടന്ന പശ്ചാത്തലത്തില്‍ യൂറോപ്യന്‍ രാജ്യങ്ങള്‍ അതീവ ജാഗ്രതയിലിരിക്കുമ്പോഴാണ് മെര്‍ക്കലിന്റെ സുരക്ഷയില്‍ ഗുരുതര വീഴ്ച സംഭവിച്ചത്. ഫ്രാന്‍സ്, ജര്‍മനി, ബെല്‍ജിയം എന്നിവിടങ്ങളിലായി ഐഎസ് (ഇസ്‌ലാമിക് സ്റ്റേറ്റ്) ഭീകരര്‍ നടത്തിയ വിവിധ ആക്രമണങ്ങളില്‍ നൂറുകണക്കിന് ആളുകളാണ് കൊല്ലപ്പെട്ടത്.
https://www.facebook.com/Malayalivartha
