മെക്‌സിക്കോയില്‍ കാമുകിയുടെ സ്‌നേഹത്തോടെയുള്ള കടിയേറ്റ് കൗമാരക്കാരനായ കാമുകനു ജീവന്‍ നഷ്ടമായി. പ്രേമം തലയ്ക്കു പിടിച്ചാല്‍ പിന്നെ ചുറ്റിനുള്ളതൊന്നും കാണില്ല സാറേ എന്ന് നിവിന്‍ പോളി പറഞ്ഞത് വെറുതെയല്ല. 24കാരിയാണ് 17കാരനായ കാമുകനെ കടിച്ചത്. കഴുത്തില്‍ കടിച്ചതിനെ തുടര്‍ന്ന് തലച്ചോറിലേക്കുള്ള രക്തമൊഴുക്ക് കട്ടപിടിക്കുകയും ഇതിന്റെ ഫലമായി ബ്രെയിന്‍സ്‌ട്രോക്കിലാണ് മെക്‌സിക്കോക്കാരനായ ജൂലിയോ മാസിയാസ് ഗോണ്‍സാലെസ് മരിച്ചത്. കുടുംബത്തോടൊപ്പം ഭക്ഷണം കഴിച്ച് കൊണ്ടിരിക്കവെയായിരുന്ന ജൂലിയോ വിറച്ച് വിറച്ച് വീണാണ് മരിച്ചത്.
ജൂലിയോ മരിക്കുന്നതിനുമുമ്പ് 24കാരിയായ കാമുകിക്കൊപ്പം ഒരുദിവസം ചെലവിട്ടിരുന്നു. അന്ന് പ്രണയപാരവശ്യത്തിനിടെ കാമുകി ജൂലിയോയുടെ കഴുത്തില്‍ സ്‌നേഹത്തോടെ നല്ലൊരു കടിയും കൊടുത്തിരുന്നു. അന്ന് കാര്യമായ പ്രശ്‌നങ്ങളൊന്നുമുണ്ടായില്ലതാനും. സംഭവം വലിയ വാര്‍ത്തയായതോടെ യുവതിക്കെതിരേ കൊലക്കുറ്റത്തിനു കേസെടുക്കണമെന്ന ആവശ്യം ശക്തമായിട്ടുണ്ട്.
ഇത്തരം കടി മരണങ്ങള്‍ അസാധാരണമല്ല. 2011ല്‍ 44കാരിയായ ഒരു സ്ത്രീ ഇത്തരം കടിയേറ്റ് ഭാഗികമായി പക്ഷാഘാതം പിടിപെട്ട് കിടപ്പിലായിരുന്നു. സ്ത്രീയുടെ വലതുകൈയുടെ ചലനശേഷി നഷ്ടപ്പെടുകയും ചെയ്തിരുന്നു. ഇനി കാമുകിമാരുടെ കടിയില്‍ നിന്നു രക്ഷപ്പെടാന്‍ കഴുത്തുമൂടുന്ന ഉപകരണങ്ങള്‍ കണ്ടുപിടിക്കേണ്ടിവരുമോയെന്ന രീതിയിലുള്ള പരിഹാസങ്ങളും ലാറ്റിനമേരിക്കന്‍ മാധ്യമങ്ങളില്‍ വരുന്നുണ്ട്.