ഫിലിപ്പീന്‍സ് തലസ്ഥാനമായ മാനിലയില്‍ നിന്നും 960 കിലോ മീറ്റര്‍ ദൂരെയുള്ള ദാവോ സിറ്റിയിലെ മാര്‍ക്കറ്റില്‍ സ്‌ഫോടനത്തെ തുടര്‍ന്ന് 12 പേര്‍ കൊല്ലപ്പെട്ടതായി റിപ്പോര്‍ട്ട്. ഫിലിപ്പീന്‍സിലെ തിരക്കുള്ള മാര്‍ക്കറ്റുകളില്‍ ഒന്നാണ് ദാവോയിലേത്. നിരവധിപേര്‍ക്ക് പരിക്കേട്ടതായും റിപ്പോര്‍ട്ട ചെയ്തിട്ടുണ്ട്. 20 ലക്ഷത്തോളം ജനങ്ങള്‍ താമസിക്കുന്ന ദക്ഷിണ ഫിലിപ്പീന്‍സിലെ വലിയ നഗരമാണ് ദാവോ.

വിനോദ സഞ്ചാരികളടക്കം ജനങ്ങള്‍ ധാരാളം പേരുള്ള ദാവോയിലെ ആഡംബര ഹോട്ടലായ മാര്‍ക്കോ പോളോയ്ക്ക് സമീപമാണ് സ്‌ഫോടനമുണ്ടായത്.

പരിക്കേറ്റ 30 പേരെ ആസ്പത്രിയിലേക്ക് മാറ്റിയതായി സൈനിക വക്താവ് അറിയിച്ചു. ഇസ്ലാമിക തിവ്രവാദികളും കമ്മ്യൂണിസ്റ്റ് വിമതരും ദാവോ നഗരത്തില്‍ അക്രമങ്ങള്‍ നടത്താറുണ്ട്. കഴിഞ്ഞ തിങ്കളാഴ്ച ഉണ്ടായ ആക്രമണത്തില്‍ 12 ഫിലിപീന്‍സ് പട്ടാള ഉദ്യോഗസ്ഥര്‍ കൊല്ലപ്പെട്ടിരുന്നു. ആക്രമണത്തിന് പിന്നില്‍ ആരെന്ന് വ്യക്തമായിട്ടില്ല.