വിവാഹവാഗ്ദാനം നല്‍കി യുവതിയെ പീഡിപ്പിച്ച് ഗര്‍ഭിണിയാക്കി. പ്രസവശേഷം കുഞ്ഞിനെ 25,000 രൂപയ്ക്ക് വിറ്റു. ഉത്തര്‍പ്രദേശിലെ ബറയ്‌ലിയിലാണ് സംഭവം. ഷാവേസ് എന്ന യുവാവാണ് വിവാഹം കഴിക്കാമെന്ന വ്യാജേന യുവതിയെ പീഡിപ്പിച്ചത്. എന്നാല്‍ ഗര്‍ഭിണിയാണെന്ന് അറിഞ്ഞതോടെ പുറത്തുപറഞ്ഞാല്‍ കൊല്ലുമെന്ന് പറഞ്ഞ് ഇയാള്‍ യുവതിയെ ഭീഷണിപ്പെടുത്തി.

എന്നാല്‍ സംഭവം പുറത്തറിയുകയും നാട്ടുകാര്‍ യുവതിയെ വിവാഹം കഴിക്കണമെന്നാവശ്യപ്പെട്ട് രംഗത്തെത്തുകയും ചെയ്തതോടെ മറ്റു നിവൃത്തിയില്ലാതെ യുവാവിന് വിവാഹത്തിന് സമ്മതിക്കേണ്ടി വന്നു. എന്നാല്‍ യുവതി പ്രസവിച്ചതോടെ കുഞ്ഞിനെ സംരക്ഷിക്കാന്‍ കൂട്ടാക്കാത്ത
ഇയാള്‍ മക്കളില്ലാത്ത ദമ്പതികള്‍ക്ക് 25,000 രൂപയ്ക്ക് കുഞ്ഞിനെ വില്‍ക്കുകയായിരുന്നു.

പിന്നീട് ഇയാളില്‍ നിന്നും ഏല്‍ക്കേണ്ടി വന്ന നിരന്തരപീഡനത്തെ തുടര്‍ന്ന് വിവാഹമോചനം നേടിയ യുവതി മകളെ തിരിച്ചുകിട്ടണമെന്നാവശ്യപ്പെട്ട് ഇപ്പോള്‍ പരാതിയുമായി പോലീസിനെ സമീപിച്ചിരിക്കയാണ്. യുവാവ് ഏഴു മക്കളുള്ള മറ്റൊരാളെ വിവാഹം കഴിക്കാന്‍ നിര്‍ബന്ധിക്കുന്നുവെന്നും യുവതി പരാതിയില്‍ പറയുന്നു.