വാര്‍ത്തയുടെ തലക്കെട്ട് വിശ്വസിക്കാന്‍ അല്‍പം പ്രയാസം ഉണ്ട് അല്ലേ? എന്ന് വച്ച് അവിശ്വസിക്കരുത്, വിശ്വസിക്കണം ലോകത്ത് ഇത്തരം ജോലികളും ഉണ്ട്. അക്ഷരാര്‍ത്ഥത്തില്‍ വെറുതേ ഇരുന്ന് ശമ്പളം വാങ്ങുകയാണ് അന്ന. ഈ ഇരിപ്പ് തന്നെയാണ് അന്നയുടെ ജോലി എന്ന് പറഞ്ഞാല്‍ വിശ്വസിക്കാനാവുമോ?

കുറച്ച് ടെന്‍ഷന്‍ അധികമായാല്‍, ശന്പളം വൈകിയാല്‍.. കുറഞ്ഞാലുമെല്ലാം നമ്മളില്‍ പലരും ചെയ്യുന്ന ജോലിയെ പഴിക്കും. എത്ര ആസ്വദിച്ച് ചെയ്യുന്ന ജോലിയായാലും ചില ദിവസങ്ങളിലെ എക്‌സ്ട്രാ വര്‍ക്ക് നിങ്ങളുടെ മനം മടുപ്പിച്ചിട്ടില്ലേ. ആ സ്ഥാനത്താണ് അന്നയുടെ ജോലി നമ്മെ അന്പരപ്പിക്കുക. ദിവസം പത്ത് മണിക്കൂര്‍ സോഫയിലിരുന്ന് എന്ത് ചെയ്താലും മതി, അത് അന്നയുടെ ജോലിയാവും. പക്ഷേ സോഫയില്‍ നിന്ന് താഴെ ഇറങ്ങരുതെന്ന് മാത്രം. കാരണം സോഫാ ടെസ്റ്റര്‍ എന്നതാണ് അന്നയുടെ ജോലിയുടെ പേര്. ദിവസം പത്ത് മണിക്കൂറാണ് അന്ന സോഫകളോടൊപ്പം കഴിച്ച് കൂട്ടുന്നത്.

സോഫയില്‍ ഇരിക്കാം കിടക്കാം. വ്യായാമം ചെയ്യാം, പക്ഷേ ഒരു കാര്യം സോഫയെ കുറിച്ചുള്ള നിര്‍ദേശങ്ങള്‍ വ്യക്തമായി അധികാരികളെ അറിയിക്കണം. റഷ്യയിലെ ഏറ്റവും വലിയ ഫര്‍ണ്ണീച്ചര്‍ കടയായ എം ഇസഡ് ഫൈവ് എന്ന കടയിലാണ് അന്നയുടെ ജോലി. അന്ന സെര്‍ദാന്‍ സെവ എന്നാണ് ഈ ഇരുപത്തിയാറുകാരിയുടെ മുഴുവന്‍ പേര്. 5000 അപേക്ഷകരില്‍ നിന്നാണ് കന്പനി അന്നയെ ഈ ജോലിയ്ക്കായി തെരഞ്ഞെടുത്തത്.

അന്നയുടെ നിര്‍ദേശങ്ങള്‍ സ്വീകരിച്ചശേഷമാണ് കന്പനി അടുത്ത ഡിസൈനില്‍ സോഫ ഉണ്ടാക്കുക. ഇപ്പോള്‍ മൂന്ന് മാസത്തെ പ്രൊബേഷണറി പീരിഡിലാണ് അന്ന. 64000 രൂപയാണ് ഈ ഘട്ടത്തില്‍ കന്പനി അന്നയ്ക്ക് നല്‍കുന്നത്.