വിവാഹം ചെയ്തത് തോക്കിന്‍മുനയില്‍ നിര്‍ത്തി; പാക് യുവാവിനെതിരെ ഗുരുതര ആരോപണവുമായി ഇന്ത്യന്‍ യുവതി രംഗത്ത്
ഇന്ത്യയിലേക്ക് മടക്കി അയക്കണമെന്ന് ആവശ്യപ്പെട്ട് പാക്കിസ്ഥാനിലെ ഇന്ത്യന്‍ സ്ഥാനപതികാര്യാലയത്തിലെത്തിയ യുവതി പുതിയ വെളിപ്പെടുത്തലുമായി രംഗത്ത്. പാക് യുവാവായ താഹിര്‍ അലി തന്നെ തോക്കിന്‍മുനയില്‍ നിര്‍ത്തി വിവാഹം കഴിക്കുകയായിരുന്നെന്ന് യുവതി പറഞ്ഞു. യുവതിയായ ഉസ്മയാണ് പാക് യുവാവിനെതിരെ ഗുരുതര ആരോപണം ഉന്നയിച്ചത്.
തന്റെ എമിഗ്രേഷന്‍ പേപ്പറുകള്‍ യുവാവ് കൈവശപ്പെടുത്തിയതായും ഇവര്‍ ആരോപിച്ചു. ഭര്‍ത്താവ് താഹിര്‍ തന്നെ ഉപദ്രവിച്ചതായും ഭീഷണിപ്പെടുത്തിയതായും കാട്ടി ഉസ്മ ഇസ്‌ലാമാബാദ് കോടതിയില്‍ ഹര്‍ജി ഫയല്‍ ചെയ്തു. മജിസ്‌ട്രേറ്റിന് മുന്‍പാകെ ഉസ്മ മൊഴിയും നല്‍കിയിട്ടുണ്ട്. തനിക്ക് സുരക്ഷിതമായി ഇന്ത്യയില്‍ തിരിച്ചെത്തണമെന്നും അതുവരെ ഇന്ത്യന്‍ ഹൈക്കമ്മീഷന്‍ വിടില്ലെന്നും ഉസ്മ പറഞ്ഞു.
കഴിഞ്ഞ ദിവസം താഹിര്‍ ഭാര്യയെ കാണാനില്ലെന്ന് പരാതി നല്‍കിയിരുന്നു. പാക്കിസ്ഥാനിലെ ഇന്ത്യന്‍ ഹൈക്കമ്മീഷനിലേക്ക് പോയ ഭാര്യ പിന്നീട് തിരിച്ച് വന്നില്ലെന്നും ഇന്ത്യ തടഞ്ഞുവച്ചിരിക്കുകയാണെന്നും കാട്ടിയായിരുന്നു താഹിര്‍ പോലീസില്‍ പരാതി നല്‍കിയത്.
മലേഷ്യയില്‍വച്ചാണ് പാക് പൗരനായ താഹിറും ഇന്ത്യക്കാരിയായ ഉസ്മയും പ്രണയത്തിലാകുന്നത്. മെയ് ഒന്നിന് ഇന്ത്യയിലെത്തിയ ഇരുവരും വാഗ അതിര്‍ത്തിവഴി പാക്കിസ്ഥാനിലെത്തി മെയ് മൂന്നിന് വിവാഹിതരായി. ഭാര്യയുടെ ഡല്‍ഹിയിലുള്ള സഹോദരനുമായി ബന്ധപ്പെട്ടപ്പോള്‍ ഹണിമൂണിനായി ഡല്‍ഹിയിലേക്ക് ക്ഷണിച്ചു. ഇന്ത്യയിലെത്താന്‍ വിസയ്ക്ക് അപേക്ഷിക്കുന്നതിനായി ഇന്ത്യന്‍ ഹൈക്കമ്മീഷില്‍ എത്തിയപ്പോള്‍ ഭാര്യയെ കാണാതായെന്നാണ് താഹിര്‍ പരാതിയില്‍ പറയുന്നത്.
മണിക്കൂറുകള്‍ കാത്തിരുന്നിട്ടും ഉസ്മയെ കാണാഞ്ഞതിനെ തുടര്‍ന്ന് അന്വേഷിച്ചപ്പോള്‍ അവിടെ ഇല്ലെന്ന മറുപടിയാണ് താഹിറിന് ലഭിച്ചത്. ഫോണുകള്‍ തിരിച്ച് നല്‍കാന്‍ തയാറായില്ല. തുടര്‍ന്നാണ് താഹിര്‍ പോലീസില്‍ പരാതി നല്‍കിയത്.
https://www.facebook.com/Malayalivartha
