വിവാഹവേദിയിലേക്ക് സിംഹപ്പുറത്തുവരണമെന്നായിരുന്നു ഷെയ്ഖ് മുഹമ്മദിന്റെ ആഗ്രഹം. അത് ഭാഗീകമായെങ്കിലും നടപ്പിലാക്കാന്‍ ഷെയ്ഖിന്റെ അച്ഛന്‍ തയ്യാറായി. സിംഹത്തെ കൂട്ടിലടച്ച് വിവാഹ വേദിയിലെത്തിച്ചു. വിവാഹത്തിനെത്തിയ 15,000ത്തോളം അതിഥികളെ അമ്പരിപ്പിച്ച വിവാഹ ഘോഷയാത്രയായിരുന്നു അത്. സിംഹത്തെക്കാള്‍ വരനെ ഏറെക്കുറെ മൂടിയ സ്വര്‍ണക്കൂമ്പാരമായിരുന്നു അതിഥികളുടെ മുഖം മഞ്ഞളിപ്പിച്ചത്.

പാക്കിസ്ഥാനിലെ മുള്‍ട്ടാനിലാണ് ഈ വിവാഹ ധൂര്‍ത്തിന് വേദിയായത്. മകന്റെ സ്വപ്‌നം സാക്ഷാത്കരിക്കുകയായിരുന്നു താനെന്ന് പിതാവ് പറയുന്നു. സിംഹത്തെ കൂട്ടിലടച്ച് അതിനുമുകളില്‍ സ്ഥാപിച്ച പ്രത്യേക ഇരിപ്പിടത്തിലാണ് മുഹമ്മദ് വിവാഹ വേദിയിലേക്ക് വന്നത്. ഘോഷയാത്രയെ ഗംഭീരമാക്കിയ വരന്റെ സംഘം വഴിനീളെ നോട്ടുകള്‍ വാരിവിതറി നാട്ടുകാരെയും സന്തോഷിപ്പിച്ചു. ലോറിയിലും തെരുവിലും നിറഞ്ഞ നര്‍ത്തകരായിരുന്നു ഘോഷയാത്രയുടെ മറ്റൊരു പ്രത്യേകത.

വരന്റെ കുടുംബത്തോട് പിടിച്ചുനില്‍ക്കാന്‍ പറ്റിയില്ലെങ്കിലും വധുവിന്റെ കൂട്ടരും മോശമാക്കിയില്ല. അഞ്ചുകോടി രൂപയ്ക്ക് തുല്യമായ പണമാണ് അവര്‍ സ്ത്രീധനമായി നല്‍കിയത്. ഈ പണം വിവാഹ വേദിയില്‍ പ്രദര്‍ശിപ്പിച്ചിരുന്നു. ഒരു ഹോണ്ട കാറും സമ്മാനമായി നല്‍കി. വരന്റെ സഹോദരങ്ങള്‍ക്കും അടുത്ത സുഹൃത്തുക്കള്‍ക്കും ബൈക്കുകളും കിട്ടി. വരനും കുടുംബത്തിനുമുള്ള എല്ലാത്തരം ഇലക്ട്രിക് ഉപകരണങ്ങളും സമ്മാനങ്ങളുടെ കൂട്ടത്തിലുണ്ടായിരുന്നു.

വിവാഹ ധൂര്‍ത്തിനെതിരെ ദിവസങ്ങള്‍ക്കുമുന്നെ സോഷ്യല്‍ മീഡിയയിലൂടെ വിമര്‍ശനം ഉയര്‍ന്നിരുന്നു. സിംഹത്തെ പീഡിപ്പിക്കുകയാണ് ചെയ്യുന്നതെന്ന് മൃഗസ്‌നേഹികളും പരാതിപ്പെട്ടു. എന്നാല്‍, പണത്തിന് മുന്നില്‍ ഇതെല്ലാം നിശബ്ദമായി. വിവാഹ ധൂര്‍ത്തിനെക്കുറിച്ച് അന്വേഷിക്കാന്‍ പാക്കിസ്ഥാന്‍ ആദായ നികുതി വകുപ്പ് ശ്രമം തുടങ്ങിയിട്ടുണ്ട്. വരന്റെ വീട്ടുകാര്‍ക്ക് അവര്‍ നോട്ടീസയച്ചിട്ടുണ്ട്.

ബെംഗളൂരുവില്‍ ഖനി രാജാവ് ജനാര്‍ദ്ദന്‍ റെഡ്ഡി മകളുടെ വിവാഹത്തിന് 500 കോടി രൂപ ചെലവിട്ടതുമായി താരതമ്യപ്പെടുത്തിയാണ് പാക്കിസ്ഥാന്‍ മാധ്യമങ്ങള്‍ ഈ വിവാഹ ധൂര്‍ത്ത് ആഘോഷിച്ചത്. കൊല്ലത്തുനടന്ന രവി പിള്ളയുടെ മകളുടെ വിവാഹവും ചില മാധ്യമങ്ങള്‍ താരതമ്യപ്പെടുത്തി.