ഇസ്രായേൽ വിമാനം അപായപ്പെടുത്താൻ ശ്രമിച്ചവന്റെ മുഖം പുറത്ത് . ടെല്‍ അവീവിലേക്ക് പറന്ന ഫ്‌ലൈ ദുബായ് വിമാനം ആകാശത്തുവെച്ച് അപായപ്പെടുത്താന്‍ ശ്രമിച്ച സംഭവത്തില്‍ പ്രതിയായ കോ-പൈലറ്റിന്റെ പേരും ചിത്രവും പുറത്തുവന്നു. തീവ്രവാദ ആശയങ്ങളില്‍ ആകൃഷ്ടനായതിനെ തുടര്‍ന്ന് ഒമാന്‍ പറക്കല്‍ വിലക്ക് ഏര്‍പ്പെടുത്തിയിരുന്ന ഒമാന്‍ സ്വദേശി ഹമാം അല്‍ ഹമ്മാമി (Hamam al-Hammami) ആണ് പിടിയിലായത്. ഒമാന്റെ വിലക്ക് നിലനില്‍ക്കെത്തന്നെ, ദുബായ് ആസ്ഥാനമായുള്ള ഫ്‌ലൈ ദുബായ് എയര്‍ലൈന്‍ ഇയാളെ ജോലിക്ക് എടുക്കുകയും യു.എ.ഇ. - ഇസ്രായേല്‍ തമ്മിലുള്ള അതീവ സംവേദനക്ഷമതയുള്ള റൂട്ടില്‍ പൈലറ്റായി നിയമിക്കുകയുമായിരുന്നു.

ബുധനാഴ്ച ദുബായില്‍നിന്ന് ഇസ്രായേലിലെ ടെല്‍ അവീവിലേക്ക് 182 യാത്രക്കാരുമായി പുറപ്പെട്ട FZ 1073 വിമാനത്തിലാണ് ഞെട്ടിക്കുന്ന സംഭവം അരങ്ങേറിയത്. യാത്രയ്ക്കിടെ വിമാനത്തിന്റെ ക്യാപ്റ്റനെ കുത്തിപ്പരിക്കേല്‍പ്പിച്ച ശേഷം നിയന്ത്രണം ഏറ്റെടുത്ത് വിമാനം തകര്‍ക്കാന്‍ ഹമാം അല്‍ ഹമ്മാമി ശ്രമിക്കുകയായിരുന്നു. ആക്രമണത്തെത്തുടര്‍ന്ന് വിമാനം പെട്ടെന്ന് 18,000 അടി താഴേക്ക് പതിച്ചത് യാത്രക്കാരെ കടുത്ത ഭീതിയിലാഴ്ത്തി.ഇന്ത്യക്കാരനായ ക്യാപ്റ്റന്‍ സ്മിത് മച്ചാറിന്റെ സമയോചിതമായ ഇടപെടലും പ്രതിരോധവുമാണ് വന്‍ ദുരന്തം ഒഴിവാക്കിയത്. രക്തം വാര്‍ന്നൊഴുകുന്ന അവസ്ഥയിലും ക്യാപ്റ്റന്‍ ആക്രമണത്തെ ചെറുത്തുതോല്‍പ്പിച്ചു.

തുടര്‍ന്ന് വിമാനത്തിലുണ്ടായിരുന്ന ധീരരായ യാത്രക്കാരും ഡ്യൂട്ടിയിലില്ലാതിരുന്ന മറ്റ് പൈലറ്റുമാരും ചേര്‍ന്ന് അക്രമിയെ കീഴ്‌പ്പെടുത്തി ബന്ധിക്കുകയായിരുന്നു.മുമ്പ് ഒമാന്‍ എയറില്‍ സേവനമനുഷ്ഠിച്ചിരുന്ന ആളാണ് ഹമാം അല്‍ ഹമ്മാമി. എന്നാല്‍, ഇയാളുടെ മൊബൈല്‍ ഫോണില്‍ തീവ്രവാദ ആശയങ്ങള്‍ അടങ്ങിയ രേഖകളും സന്ദേശങ്ങളും കണ്ടെത്തിയതിനെ തുടര്‍ന്ന് ഒമാന്‍ എയര്‍ ഇയാളെ പൈലറ്റ് സ്ഥാനത്തുനിന്ന് മാറ്റുകയും പിന്നീട് ജോലിയില്‍നിന്ന് പുറത്താക്കുകയുമായിരുന്നു.ഒമാന്‍ ദേശീയ വിമാനക്കമ്പനിയില്‍ പരിശീലന ഘട്ടത്തില്‍ത്തന്നെ ഹമാം തീവ്രവാദ ഗ്രൂപ്പുകളുടെ ആശയങ്ങള്‍ വെച്ചുപുലര്‍ത്തുന്നതായി കണ്ടെത്തിയിരുന്നു.

ഇതിനെത്തുടര്‍ന്ന് ഇയാളെ വിമാനം പറത്തുന്നതില്‍നിന്ന് മാറ്റി നിര്‍ത്തി മറ്റൊരു തസ്തികയിലേക്ക് മാറ്റിയിരുന്നതായി മേഖലയിലെ നയതന്ത്ര സ്രോതസ്സുകളെ ഉദ്ധരിച്ച് അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തു.ഫ്ളൈ ദുബായ് കോപൈലറ്റിന്റെ ഭൂതകാലത്തെക്കുറിച്ചുള്ള ഞെട്ടിക്കുന്ന വിവരങ്ങൾ പുറത്തുവന്നതോടെ, വ്യോമയാന മേഖലയിലെ പശ്ചാത്തല പരിശോധനകളുടെ (Background checks) സുരക്ഷാ മാനദണ്ഡങ്ങളെക്കുറിച്ച് വലിയ ആശങ്കകളാണ് ഇപ്പോൾ ഉയരുന്നത്.ബുധനാഴ്ച ദുബായിൽ നിന്നും ടെൽ അവീവിലേക്ക് പറന്ന ഫ്ലൈ ദുബായ് 737 മാക്സ് 8 (Flydubai 737 MAX 8) വിമാനമാണ് ആകാശത്ത് നാടകീയ രംഗങ്ങൾക്കൊടുവിൽ സൗദി അറേബ്യയിലേക്ക് തിരിച്ചുവിട്ടത്.

എന്നാൽ, അന്വേഷണം പുരോഗമിക്കുന്നതിനാൽ വിഷയത്തിൽ ഇപ്പോൾ ഔദ്യോഗിക പ്രതികരണത്തിനില്ലെന്നാണ് ഫ്ലൈ ദുബായ് വ്യക്തമാക്കുന്നത്.അതേസമയം, സംഭവത്തിന് പിന്നാലെ ദുരൂഹതയുണർത്തുന്ന ചില സോഷ്യൽ മീഡിയ പോസ്റ്റുകളും പുറത്തുവന്നിട്ടുണ്ട്. കോപൈലറ്റിന്റെ ലിങ്ക്ഡ്ഇൻ (LinkedIn) പ്രൊഫൈലിൽ ബുധനാഴ്ച, അതായത് വിമാന സംഭവം നടന്ന് കൃത്യം ഒൻപത് മണിക്കൂറുകൾക്ക് ശേഷം അടുത്തടുത്തായി രണ്ട് പോസ്റ്റുകൾ പ്രത്യക്ഷപ്പെട്ടു. ഈ പോസ്റ്റുകൾ ആരാണ് പങ്കുവെച്ചതെന്നോ, അതോ നേരത്തെ തന്നെ ഷെഡ്യൂൾ ചെയ്തു വെച്ചതാണോ എന്ന കാര്യം വ്യക്തമല്ല.