ആധുനിക കാലത്ത് സോഷ്യല്‍ മീഡിയകളുടെ ഉപയോഗം വളരെ അധികം കൂടിവരുന്നു. ഒരേ സമയം ഗുണവും ദോഷവും ഇതില്‍ നിന്നും ലഭിക്കുന്നു. എന്നാല്‍ ഇന്‍സ്റ്റഗ്രാം ചെറുപ്പക്കാരുടെ മാനസികാരോഗ്യത്തെ ദോഷകരമായി ബാധിക്കുന്നുവെന്നാണ് യു കെ യില്‍ നടത്തിയ ഒരു സര്‍വേ പറയുന്നത്. മറ്റേതൊരു പ്രായക്കാരെക്കാളും അധികം തൊണ്ണൂറു ശതമാനവും ചെറുപ്പക്കാരാണ് ഇവ ഉപയോഗിക്കുന്നത്. അതുകൊണ്ടുതന്നെ ദൂഷ്യഫലങ്ങളും ചെറുപ്പക്കാരെയാണ് കൂടുതല്‍ ബാധിക്കുന്നത്. 

14 മുതല്‍ 24 വയസ്സു വരെ പ്രായമുള്ള 1479 പേരില്‍ റോയല്‍ സൊസൈറ്റി ഫോര്‍ പബ്ലിക് ഹെല്‍ത്ത് (ഞഇജഒ) ആണ് സര്‍വേ നടത്തിയത്. ഇവരോട് കുറെ ചോദ്യങ്ങള്‍ ചോദിച്ചു. യൂട്യൂബ്, ഇന്‍സ്റ്റഗ്രാം, സ്‌നാപ് ചാറ്റ്, ഫേസ്ബുക്ക്, ട്വിറ്റര്‍ എന്നിവ ഇവരെ എങ്ങനെ ബാധിക്കുന്നു എന്നറിയുകയായിരുന്നു സര്‍വേയുടെ ലക്ഷ്യം. സമൂഹ്യമാധ്യമങ്ങള്‍ ചെറുപ്പക്കാരില്‍ ഗുരുതരമായ മാനസികാരോഗ്യ പ്രശ്‌നങ്ങള്‍ ഉണ്ടാക്കുന്നതായി ഈ സര്‍വേഫലം പറയുന്നു. 

പഠനത്തില്‍ പങ്കെടുത്തവരോട് ആരോഗ്യത്തെയും സൗഖ്യത്തെയും കുറിച്ചുള്ള 14 ചോദ്യങ്ങള്‍ ചോദിച്ചു. ഇതിനെ അടിസ്ഥാനമാക്കി മാനസികാരോഗ്യത്തിന് വലിയ രീതിയില്‍ ദോഷം ചെയ്യാത്തതായി കണ്ടെത്തിയത് 
യൂ ട്യൂബിനെയാണ്. തൊട്ടുപിന്നില്‍ ട്വിറ്ററും ഫെയ്‌സ്ബൂക്കുമുണ്ട്. ഏറ്റവും കുറവ് സ്‌കോര്‍ ലഭിച്ചത് സ്‌നാപ്ചാറ്റിനും ഇന്‍സ്റ്റഗ്രാമിനും ആണ്. 

സമൂഹമാധ്യമങ്ങളെ നല്ലതിനു വേണ്ടിയുള്ള ഒരു ഉപകരണമാക്കാന്‍ കഴിയുമെന്നും കമ്പനികള്‍ ഇവയെ എറ്റവും സുരക്ഷിതമായ ഒരു പ്ലാറ്റ്‌ഫോം ആക്കിമാറ്റാന്‍ ശ്രമിക്കുന്നുണ്ടെന്നും റിപ്പോര്‍ട്ടില്‍ പറയുന്നു.