എന്റെ അമ്മേ ഓടി വായോ.മനുഷ്യകുഞ്ഞുങ്ങളില്‍ മാത്രമല്ല മൃഗങ്ങളിലും കുട്ടിക്കുറുമ്പ് സര്‍വസാധാരണമാണ്. ഇത്തരത്തില്‍ ഒരു അടവ് പ്രയോഗിക്കുകയാണ് അച്ഛനമ്മമാര്‍ക്കൊപ്പം നടന്നു പോയ ഒരു കുട്ടിക്കൊമ്പന്‍. കുട്ടിയാനയുടെ കുറുമ്പ് ഇങ്ങനെ പലതും കണ്ടിട്ടുള്ളതു കൊണ്ടാവാം കുട്ടിക്കൊമ്പന്റെ നമ്പറൊന്നും ഇവരുടെ അടുത്ത് വിലപ്പോയില്ല.
ആഫ്രിക്കയിലെ സാവന്ന പുല്‍മേടുകളില്‍ നിന്നാണ് കുട്ടിക്കുറുമ്പന്റെ കുസൃതി ഏറിയ നിമിഷങ്ങള്‍ ചിത്രീകരിച്ചിരിക്കുന്നത്. റോഡിലൂടെ നടന്നു നീങ്ങിയ കുട്ടിക്കൊമ്പന് പെട്ടെന്നാണ് ഇങ്ങനെ ഒരു ഐഡിയ തോന്നിയത്. ഉടന്‍ അവന്‍ കലാപരിപാടികള്‍ തുടങ്ങി. എന്തിരുന്നാലും കുട്ടിയാന നന്നായി അഭിനയിക്കുന്നുണ്ട്. മുഖത്ത് ഒരു ഭാവവ്യത്യാസം ഇല്ലാതെയാണ് കുറുമ്പന്റെ അടവ്.
അത്രയും നേരെ മുമ്പേ നടന്ന് നീങ്ങിയ ആനക്കുട്ടന് പെട്ടെന്നാണ് നടക്കാന്‍ ഒരു മടി തോന്നിയത്. ഉടനെ റോഡിലെ പുല്ലിലേക്ക് കയറിയ ആനക്കുട്ടി പതുക്കെ അവിടെ ഇരിക്കുന്നു. ഇരുന്ന് നിരങ്ങിയ ശേഷം അവന്‍ നേരെ നിരങ്ങി നിരങ്ങി റോഡിലേക്ക് കിടക്കുകയാണ്. അസ്വസ്ഥത അഭിനയിച്ച് മറ്റുള്ളവരുടെ ശ്രദ്ധ പിടിച്ച് പറ്റാന്‍ ശ്രമിക്കുകയും ചെയ്തു. ആനക്കുട്ടന്റെ അഭിനയം ഓവര്‍ ആയതുകൊണ്ടോ എന്തോ അച്ഛനും അമ്മയും ഇവന്റെ നമ്പറുകളൊന്നും കണ്ടഭാവം നടിക്കാതെ മുന്നോട്ടേക്ക് നടന്നുനീങ്ങി. അല്‍പനേരം കഴിഞ്ഞ് കുട്ടികുറുമ്പന് മനസിലായി അവനെ ആരും നോക്കുന്നില്ലായെന്ന്. അച്ഛനും അമ്മയും കുറച്ച് ദൂരം നടന്ന് നീങ്ങിയതോടെ തന്റെ അഭിനയത്തില്‍ വീഴിന്നെല്ല് മനസ്സിലാക്കിയ ആനക്കുട്ടി ഓടിച്ചെന്ന് അവര്‍ക്കൊപ്പം കൂടുന്ന കാഴ്ചയും കണ്ടാല്‍ ആരും ചിരിച്ചു പോകും.